Медицинада бүгінгі таңда денсаулық сақтау ісінде іргелі теориямен қатар пәнаралық әдістер батыл енуде. Санжар Асфендияров атындағы ҚазҰМУ-дың С. Қарынбаев атындағы қалыпты анатомия кафедрасында бұл процесс үздіксіз ғылыми-білім беру цикліне айналған. Медицина ғылымдарының докторы, профессор Әсия Төлеубайқызы Дүйсембаева 70 жылдық мерейтойына арналған ғылыми семинарда академиялық нәтижелерін таныстырды. Ғалымның көпжылдық зерттеулері Қазақстандағы экологиялық морфологияның іргетасын қалады. Еліміздегі кәсіби білікті медицина кадрларын даярлаудағы жаңа белеске айналды.
Әсия Төлеубайқызы Дүйсембаеваның өмір жолы отандық медицина тарихымен тығыз байланысты. Ол 1979 жылы Алматы мемлекеттік медицина институтының педиатрия факультетін бітірген соң, балалар дәрігерінің клиникалық ойлау жүйесін іргелі академиялық ғылыммен ұштастырудың ең күрделі жолын таңдады. 1981 жылдан бастап оның кәсіби шаңырағына айналған ҚазҰМУ-дың қалыпты анатомия кафедрасында 45 жылдан астам ғылыми-педагогикалық қызмет етті. Еңбек жолы ассистенттен басталды. Бүгінде елге танымал профессор ұстаздық қызметін жалғастырып отыр.
Профессор Ә. Дүйсембаеваның ғылыми-инновациялық қызметінің басты жетістігі ретінде анатомия мен экология тоғысындағы қолданбалы бағытты ерекше атауға болады. Оның экотоксиканттардың әсерінен лимфоидтық мүшелердегі морфофункционалдық өзгерістер мен оларды түзетуге арналған іргелі докторлық диссертациясы заманауи сын-қатерлердің алдын алуда дәлелденген нәтижелі еңбек саналады. Ресей МҒА академигі Ю.И. Бородин, ҚР ҒА академигі А.А. Ыдырысов пен профессор Б.Н. Нұрмұхамбетова сияқты ірі ғалымдармен бірлескен эксперименттер нәтижесінде Әсия Төлеубайқызы қолайсыз қоршаған ортада ағзаның қорғаныс жүйелерін анықтауда маңызды тұжырымдарды қалыптастыра алды.
Профессордың инновациялық белсенділігі оның академиялық беделімен айшықталады. Оның қоржынында 200-ден астам ғылыми еңбек пен беделді халықаралық Scopus және Web of Science базаларындағы жарияланымдар бар. Германия, Израиль, Мысыр, Италия, Мажарстан, Испания және Португалия сияқты әлемнің ірі ғылыми алаңдарында жасаған баяндамалары әрдайым үлкен қызығушылық тудырып, қазақстандық морфология мектебінің әлемдік кеңістігіне жол ашты.
Бүгінгі таңда қалыпты анатомия кафедрасы заманауи ғылым-білім беру кластері. Профессор Ә. Дүйсембаева оқу процесін тиімді ұйымдастыра білген басшы. Он үш инновациялық оқыту әдісін әзірлеп қоймастан, оларды өндіріске енгізді.
Профессор ғылыми жиында: «Ең құнды актив - адам», - деген ұстанымды берік ұстанатынын атап өтті. Ғалым-ұстаз университеттің Білім беру бағдарламалары комитетінің төрайымы және Орталық әдістемелік кеңесінің мүшесі ретінде білікті медицина мамандарын даярлаудағы жауапкершілік пен ізденісін еш тоқтатпаған жан.
Профессор Әсия Дүйсембаеваның мектебінен өткен ҚазҰМУ студенттері озат интерактивті және графикалық құрылымдармен жұмыс істейді. Бұл оларға халықаралық олимпиадалар мен байқауларда сапалы зерттеу жобаларымен қатысуға мүмкіндік береді.
Әсия Төлеубайқызының сіңірген еңбегі ҚазҰМУ-дың «Алтын медалімен», «Үздік түлек», Үкіметтің «Еңбек ардагері» медальдарымен және беделді «Қазақстанның Алтын кітабына» енуімен жоғары лайықты бағаланған.
Профессор Әсия Дүйсембаеваның мерейтойы отандық медицина ғылымы үшін үлкен мереке. Осындай ғалымдардың арқасында қазақстандық анатомия мектебі дәстүрлер сабақтастығын жалғап келеді.
Профессор Гүлмира Сұлтанбаева