Көктемгі мерекелер қарсаңында Алматы қаласы Алатау ауданы оқушыларының инновациялық шығармашылық орталығында бүгін ерекше концерт өтті, деп хабарлайды Aqshamnews.kz
Сахнада өте кішкентай балалар өнер көрсетті. Олар ересектердей бар өнерлерін салып, жердегі ең қымбат адам - Анаға арналған әндер мен билерін орындады. Өнер көрсеткен балақайлар, өздерінің ынта-жігерлерімен орындаған әрбір көріністеріне үлкен қошеметке ие болды.
Үш жүз орынға есептелген CIT концерт залы лық толы болды. «Ана – гүл, ана – жыр, ана – өмір шуағы!» – деп атап өткен жас таланттардың концертінің көрермендері негізінен әйелдер қауымы болды.
«Біз балалар шығармашылығын дамытуға инвестиция салғанда, біз болашақтың жаңа интеллектуалды ұрпағын құрудың негізін қалаймыз. Мұндай іс-шаралар балабақша тәрбиеленушілерінің қабілеттері мен дарындарын бірлесіп ашу мақсатында ата-аналар, ұстаздар мен балалардың басын қосады. Сәбилер анаға деген құрмет пен сүйіспеншілік сезімдерін көрсетеді. Осылайша, негізгі адами құндылықтар сіңіріледі», - деді Алматы қаласы Білім басқармасы басшысы Сайран Сайфеденов мырза.
Концертті Алатау ауданының білім басқармасы ұйымдастырды. Мектеп жасына дейінгі балалар ата-аналарымен, тәрбиешілерімен және балабақша меңгерушілерімен бірге «Бір тұтас тәрбие» бағдарламасы аясында 21 концерттік нөмір көрсетті.
Балалар монологтар оқып, ән шырқады. Әндерді көрермендер бірге қосылып орындады. Әр қойылымнан кейін көрермендер тік тұрып қошемет көрсетті. Кештің ең қызық қойылымы қыздар мен олардың әкелерінің орындауындағы би болды. Көрермендер қойылым кезінде сезімге беріліп көз жастарын тыя алмады.
Ұйымдастырушылар уәде еткендей, мұндай мерекелік шаралар тұрақты түрде өткізіліп тұрады.