Бразилияның Фос-ду-Игуасу қаласында World Boxing ұйымының ұйымдастыруымен өткен бокстан Әлем кубогының алғашқы кезеңі мәресіне жетті, – деп хабарлайды aqshamnews.kz тілшісі.
Байрақты бәсеке қорытындысында Қазақстан ұлттық құрамасы 7 жүлдеге жеңіп алды: 3 алтын, 1 күміс, 3 қола.
Турнирдің басты қаһармандарының бірі – алматылық былғары қолғап шебері Виктория Графеева. Ол 60 келіге дейінгі салмақ дәрежесінде топ жарып, алтын медаль еншіледі. Финалдық айқаста ол Бразилияның қазіргі әлем чемпионын айқын басымдықпен жеңіп, жоғары деңгейдегі дайындығын, тактикалық сауаттылығын және жекпе-жекті толық бақылауда ұстай білетін шеберлігін паш етті.
Ұлттық құраманың жүлде қоржыны тағы бір медальмен толықты. Алматылық Алуа Балқыбекова 51 келіге дейінгі салмақта қола жүлдегер атанды. Жартылай финалда ол Қытай спортшысымен болған тартысты кездесуде 2:3 есебімен есе жіберді.
Алматылық спортшылардың табысты өнер көрсетуі ұлттық құраманың жалпы жетістігіне үлес қосып, олардың әлемдік додаларда бәсекеге қабілетті екенін тағы бір мәрте дәлелдеді.
Айта кетейік, Әлем кубогының келесі кезеңі маусым айында Қытайда өтсе, жарыс сериясының қорытынды бәсекесі Ташкентте ұйымдастырылады.