20 желтоқсаннан 11 қаңтарға дейін Алматы циркі қала тұрғындары мен қонақтарын жаңа жылдық көңіл-күйге бөлейтін «CHRISTMAS STARS» атты мерекелік шоу-премьераны тамашалауға шақырады, - деп хабарлайды Aqshamnews.kz.
Бұл ерекше бағдарлама қысқы маусымның басты оқиғаларының біріне айналып, көрермендерге сиқырға толы әсер сыйламақ.
17 желтоқсан күні аталмыш жобаның алғашқы, қайырымдылық қойылымы өтті.
Оған балалар үйлерінің тәрбиеленушілері, аз қамтылған отбасылардың балалары және ерекше білім беру қажеттіліктері бар балалар арнайы шақырылды. Бұл кеш кішкентай көрермендерге шаттық пен ұмытылмас әсер сыйлаған нағыз мерекеге айналды.
«CHRISTMAS STARS» - жыл сайын асыға күтетін жаңа жылдық ертегі. Қойылым көрерменді мейірім, достық пен ғажайыптар тоғысқан әсерлі атмосфераға енгізіп, цирк манежін жарық пен әуенге толы мерекелік кеңістікке айналдырады. Бағдарлама ересектер мен балаларға арналған біртұтас сюжетке құрылған.
Шоудың басты бөлімінде дрессурланған экзотикалық құстар мен жануарлар - тотықұстар, шимпанзе, әсем жүрісті аттар, шағын тұқымды иттер және балалардың сүйіктісі аюқызы Яна өнер көрсетеді.
Сонымен қатар көрерменді кәсіби әуе және партер гимнасттары, акробаттар, эквилибристер, жонглёрлер және артистік шеберлігі жоғары орындаушылардың қойылымдары күтеді. Шоудың арнайы қонағы - Мәскеуден келген әйгілі Бо клоун. Ол Монте-Карлода өткен әлемдік деңгейдегі фестивальдің арнайы жүлдегері әрі клоунада өнерінің дамуына қосқан үлесі үшін марапатталған өнерпаз.
Қойылымның көркем тұтастығын арнайы дайындалған декорациялар, жарық-инженерлік шешімдер, лазерлік эффектілер, мультимедиялық проекциялар және авторлық костюмдер айшықтай түседі. Заманауи технология мен цирк өнерінің үйлесімі көрерменге визуалды әсердің жаңа деңгейін ұсынады.
«CHRISTMAS STARS» - бұл жаңа жыл қарсаңында бала қиялын қайта оятатын ерекше шоу.
20 желтоқсан мен 11 қаңтар аралығында Алматылық цирк сізді ертегіге толы «CHRISTMAS STARS» қойылымына шақырады. Жаңа жылды циркте қарсы алып, сіз де сиқырдың бір бөлшегіне айналыңыз.