Қосымшаны Google Play және App Store арқылы жүктеп алуға болады.
Алматы қаласының №15 гимназиясының оқушысы Тимур Қырбасов өлкенің тарихын зерттеуге арналған ерекше қосымша ойлап тапты, деп хабарлайды Almaty-akshamy.kz
Министрліктің мәліметінше, бағдарлама көше немесе аялдамаға жақындаған кезде автоматты түрде нысан туралы пайдалы, танымдық тарихи ақпарат береді.
"Жоба "Менің қаламның, елімнің тарихын зерттеуде ICT-технологияларды қолдану" деп аталады. Бұл бұған дейін өзім дайындаған екі шағын қосымшаның біріктірілген нұсқасы. Біріншісі - қоғамдық көліктегі ескерту жүйесін жаңарту арқылы қала тарихын таныстыру. Бұл идея – қаладағы қоғамдық көліктердегі дыбысты хабарламалар арқылы тарихи ақпаратты қосу", – дейді Тимур Қырбасов.
Екіншісі "AIALDAMA" мобильді қосымшасы екен.
"Мен әзірлеген мобильді қосымшаны пайдаланушы көшені кесіп өткен сәтте көшеге қатысты немесе сол жердегі нысандар туралы ақпарат береді. Жобаның мақсаты – оқушыларға ел тарихын күнделікті өмірде зерттеуге көмектесу", – дейді жас талапкер.
Тимур тарихты білу өте маңызды деп санайды. Бұған қоса ол үш жобасының авторлық құқығын қорғаған. Соңғы үш жылда халықаралық және республикалық ғылыми жобалардың жүлделерін иеленді. Ал 2022 жылғы 1 маусымда Тимур "Алматы БалаFest" қалалық фестивалінде Мемлекет басшысының нұсқаушысы болған.