Алматы қалалық қоғамдық денсаулық сақтау басқармасының мәліметінше, орталық қалалық клиникалық ауруханада 40 жастағы науқастың өт қабынан 5 499 тас алынған. Бұл – отандық медицина тарихында тіркелген ең сирек жағдайлардың бірі, деп хабарлайды aqshamnews.kz
Науқас ауруханаға жедел көрсеткіштер бойынша жеткізілген. Оның негізгі шағымдары – оң жақ қабырға астындағы ауырсыну, әлсіздік, жүрек айнуы мен жалпы мазасыздық болған. Ультрадыбыстық зерттеу барысында өт қабында өте көп көлемде конкременттер (тастар) анықталып, дәрігерлер лапароскопиялық холецистэктомия (өт қабын алып тастау) жасауға шешім қабылдаған.
Алайда операция нәтижесі тәжірибелі хирургтардың өзін таңғалдырды.
– Біз көп тас болатынын болжадық, бірақ 5 500-ге жуық болады деп ешкім ойлаған жоқ. 20 жылдық тәжірибемде мұндай жағдаймен алғаш рет кездестім, – деді хирургия жөніндегі бас дәрігердің орынбасары Фараби Стамқұлов.
Операцияны жүргізген хирург Ілияс Сағиев те әсерін жасырмады:
– Өт қабы іші тасқа толып тұрған фаршталған бұрыш секілді болды. Мұндай жағдай өмірде бір рет қана кездесетін шығар, – деді ол.
Ота сәтті өтті. Хирургтар мен анестезиологтардың үйлесімді жұмысының арқасында науқас тез есін жиып, көп ұзамай ауруханадан шығарылды.
Дәрігерлердің айтуынша, өт-тас ауруы көбіне еш белгі бермей, жасырын түрде өтеді. Алайда ауру асқынған жағдайда онкологиялық дертке, ұйқыбездің жансыздануына (панкреонекроз), немесе тіпті өт-тас жыланкөзі (свищ) секілді ауыр асқынуларға әкелуі мүмкін.