Алматы қаласының Алатау ауданында “Таза Қазақстан” республикалық акциясы аясында ауқымды сенбілік өтті, – деп хабарлайды aqshamnews.kz тілшісі.
Бүгінгі сенбіліктің ойдағыдай өтуіне мердігер мекемелер үлкен қолдау көрсетті. Күрек, тырма, сыпыртқы сынды қажетті құрал-бұйымдармен Алатау ауданының әкімдігі қамтамасыз етті. Бұл өз кезегінде жұмысты сапалы атқарып шығуға септігін тигізді. Сенбілікке сергек қарайтындар тұрмыстық қалдықтарды жинап, қоқыстарды тазартып, сыпырып, айналаны ретке келтірді. Иә, көп жұмылған істе береке де, нәтиже де болады.
«Қаланы тазарту, көріктендіру жұмысы жалғасуда. Табиғатты қорғау, өзіміз ауасын жұтатын жерді, күнде жүретін жолымызды, серуендейтін саябағымызды таза ұстау – әрқайсысымыздың міндетіміз. Ауа райының қолайсыздығына, жаңбырлы күнге қарамастан сенбілікке 550-ден астам қатысты. 70 техника жұмылдырылып, нәтижесінде 250 м3 қоқыс шығарылды», – дейді Алатау ауданы әкімдігі көріктендіру бөлімінің басшысы Данияр Қаршыбеков.
Мұндай экологиялық акциялар қала тұрғындарының қоршаған ортаға деген жанашырлығын, жауапкершілігін арттырып, тазалық мәдениетін қалыптастыруға ықпал етері сөзсіз.
Нұржамал ӘЛІШ