Алматы қаласы Наурызбай ауданындағы №174 мектеп-гимназиясында оқушылар журналистика негіздерін меңгеріп, өз ойларын қағаз бетіне сауатты әрі шебер жеткізуді үйреніп жүр. Мұндай мүмкіндікке олар мектепішілік «Ұрпақ үні» газеті арқылы ие болды.
– Әлеуметтік желілер арқылы сыртқы әлеммен байланыс бүгінде қаламыздағы мектептердің өмірінің ажырамас бөлігіне айналды. Бірақ бүкіл әлемге мектеп жетістіктерін жариялау бір басқа, ал сол жетістіктер мен мектеп қаһармандарын оқушылар мен мұғалімдердің өздеріне таныстыру – мүлде басқа мәселе. Осы мақсатта «Ұрпақ үні» газеті құрылды. Бұл басылым маңызды оқиғаларды жариялап қана қоймай, оқушылар мен ұстаздар арасындағы байланысты нығайтып, «оқушы – ата-ана – мұғалім» үштігінің үйлесімді жұмысына жол ашады, – дейді Наурызбай аудандық білім бөлімінің басшысы Салтанат Құсайынова.
Мектепте қолға алынған осы әлеуметтік маңызы бар жобаның нәтижесінде арнайы медиа-студия ашылды. Жақында оқушылар өз қолдарымен әзірлеген «Ұрпақ үні» газетінің алғашқы сандарын жарыққа шығарды. Газетте мектеп өміріне қатысты қызықты, пайдалы әрі танымдық материалдар жарияланады. Басылым айына бір рет баспаханада басылып шығады. Оны оқушылар өз бастамасымен, мұғалімдердің қолдауымен жүзеге асырады. Мұғалімдер арасынан бас редактор тағайындалғанымен, негізгі жұмысты – дизайнерлік, тілшілік, фото және тағы басқа міндеттерді оқушылар өздері атқарады.
– «Ұрпақ үні» – жаңа буынның медиажобасы. Ол жастардың үнін, арманы мен көзқарасын жеткізетін басылым. Газеттің мақсаты – мектептегі шығармашылық пен ақпараттық алаңды дамыту, оқушыларды журналистика мен сөз өнеріне баулу, қоғаммен қарым-қатынас мәдениетін қалыптастыру және «оқушы – мұғалім – ата-ана» ынтымақтастығын нығайта отырып, мектептегі баспасөз орталығының жұмысын жандандыру, – дейді қазақ тілі мен әдебиеті пәнінің мұғалімі, бас редактор Жеткеншек Меңдіғалиев.
Жуырда мектепте газеттің салтанатты тұсаукесері өтті. Іс-шараға ұстаздар, оқушылар мен ардақты қонақтар қатысты.