Алматыда арнайы экономикалық және индустриялық аймақтарды дамыту жұмыстары қарқынды жалғасып жатыр, – деп хабарлайды aqshamnews.kz тілшісі.
Қазіргі таңда олардың толымдылық деңгейі 90%-дан асып, Индустриялық аймақтың екінші кезеңіндегі жер телімдерінің шамамен 80%-ы инвесторлардың жобалары үшін алдын ала резервке қойылған. Бұл туралы Алматы қаласы әкімінің орынбасары Олжас Смағұлов Өңірлік коммуникациялар қызметінде өткен брифинг барысында мәлімдеді.
Оның айтуынша, қалада жер ресурстарының шектеулі болуына байланысты инвестиция тартудың тиімді моделі қалыптасып келеді.
«Әкімдік нақты инвестициялық талаптарды белгіледі: бөлінген әр гектар жерге кемінде 3 млрд теңге инвестиция тартылуға тиіс. Басты басымдық — жоғары қосылған құны бар және заманауи жұмыс орындарын ашатын жоғары технологиялық өндірістерді дамыту», — деді Олжас Смағұлов.
Қазіргі уақытта Индустриялық аймақтың екінші кезеңі жүзеге асырылып жатыр. Жоспар бойынша жыл соңына дейін немесе келесі жылдың басында 196 гектар аумақтағы инженерлік-коммуникациялық инфрақұрылым құрылысы аяқталады. Қазірдің өзінде бұл аумақтағы жер телімдерінің шамамен 80%-ы ірі инвестициялық жобаларға бөлініп қойған.
Бизнестің жоғары сұранысын ескере отырып, қалада Индустриялық аймақты кеңейтудің үшінші кезеңі пысықталуда. Бұл кезең аясында аймақ аумағын қосымша 393 гектарға ұлғайту көзделіп отыр. Жер телімдерін сатып алу және дайындау жұмыстары 2026-2028 жылдарға жоспарланған.
Сонымен қатар, Алматыда шағын индустриялық парктерді дамытуға жаңа тәсілдер енгізілуде. Жаңартылған талаптарға сәйкес, олар екі қабатты форматта салынады, бірыңғай сәулеттік стиль сақталады. Салалық жіктеу енгізіледі, нысандар түстік белгілеу арқылы ажыратылады.
Бұдан бөлек, «Алатау» инновациялық технологиялар паркі арнайы экономикалық аймағын дамыту жалғасуда. Инвесторлар тарапынан жоғары қызығушылыққа байланысты оның аумағын кеңейту, қолданыс мерзімін ұзарту жоспарланып отыр (қазіргі қолданыс мерзімі — 2028 жылы 1 қаңтарға дейін).
Сондай-ақ, арнайы экономикалық аймақтағы басым қызмет түрлерінің тізімі кеңейтіледі. Қолданыстағы 33 бағытқа қосымша тағы 12 жаңа бағыт енгізу жоспарланып отыр. Олардың қатарында білім беру, ұшқышсыз технология, ғылыми әзірлемелер, медиаөндіріс сияқты салалар бар. Бұл шаралар Алматының инвестициялық тартымдылығын арттырып, қаланың инновация мен технология орталығы ретіндегі әлеуетін одан әрі күшейтуге мүмкіндік береді.