Алматы қаласы бойынша ҚАЖ департаментінің №11 мекемесінде «Кітап оқуға құштарлық» атты шектеусіз оқу жобасы аясында танымдық басқосу өтті, – деп хабарлайды aqshamnews.kz тілшісі.
Оған Жамбыл атындағы қалалық жасөпірімдер кітапханасының оқырмандарға қызмет көрсету бөлімінің меңгерушісі Жұмахан Нұрлыхан және Шарайна Құмарова, мекемедегі жалпы білім беретін мектептің тіл маманы А.Алиева қатысты.
Танымдық кездесуде он төрт жазалы жасөпірім өздері оқыған әр шығарманың мазмұнын, оның берер тағылымын, үлгі болар тұсын әңгімелеп берді.
Олардың поэзия кітабындағы жырды мәнерлеп, нақышына келтіре оқуынан, прозалық туындыдағы көркем сөйлемдерді беріле, әсерлі әңгімелеуінен шығармаларды қызыға оқығандары, сол арқылы көңілдеріне медеу, жандарына сая тапқандары сезілді.
Іс-шара барысында ұлы Абайдың, Бердібек Соқпақбаевтың, Асқар Сүлейменовтің, Мұхтар Әуезов шығармалары талданды.
Бізді бас бостандығынан айырылып, түзеу мекемесінде отырған жасөспірімдердің сыртқы әлемнен уақытша қол үзгенімен, жақсылыққа ұмтылып, кітап оқып, ондағы кейіпкерлерді өздеріне үлгі тұтуы қуантты.
– Жасөспірімдерді көркем әдебиет оқуға шақыратын мұндай іс-шараларға біздің балалар жиі атсалысып тұрады. Олардың терең білім алуына, ой-санасының кемелденуіне, тіл байлығының молаюына, әдеби шығармалардан нәр алуына жиі мүмкіндік жасаймыз. Уақыттарының да тиімді, мағыналы өтуі үшін осындай іс-шаралар ауадай қажет, – деді №11 мекемесі САӘПТЖБ бастығының міндетін атқарушы әділет майоры Мият Қанатов.
Әрине, кеш соңында кітапқұмар балаларға сый-сияпат ұсынылды.