Алматының ең танымал орындарының бірі – Астана алаңында басты жаңажылдық концертке дайындық аяқталуға жақын. Қазақстан эстрадасы жұлдыздарының өнер көрсетуі үшін заманауи сахна орнатылып, кәсіби дыбыс және жарық жүйелері толықтай әзірленді.
Сағат 18:00-ден бастап алматылықтар мен қала қонақтарына отандық өнер иелері мерекелік көңіл күй сыйлайды. Сахнада Мақпал Исабекова, Әлішер Кәрімов, Ақылбек Жеменей, Бейбіт Қорған, Дәулет Жанболат, Жұбаныш Жексенұлы, Диана Исмаил, Бақыт Шадаева, Абай Бегей, Тахмина Әшімбекова, Інжу Әнуарбек, Әбік Жексен, Асхат Тарғын, Дәлел Уашев, Мақсат Базарбаев, Дәурен Байбөрі өнер көрсетеді. Сонымен қатар Ringo, Ninety One, Ayree, Astra, Dakelot, Muzart Life топтары да концерттің көркін қыздырмақ.
Концерт бағдарламасының ерекше бөлігі DJ BATTLE болмақ. Батл барысында диджейлер жаңажылдық әуендер мен танымал хиттердің заманауи өңделген авторлық микстерін ұсынып, кешке айрықша серпін мен мерекелік көңіл күй сыйлайды.
Астана алаңы концерт басталмай тұрып-ақ халыққа лық тола бастады.
– Біз мерекені асыға күтіп отырмыз, отбасымызбен бірге жаңажылдық концертті тамашалауға келдік. Егер кешті Аяз ата мен Ақшақар ашса, тіпті тамаша болар еді, – дейді Рахметовтер отбасының өкілдері. Анасы Балжан Ақтаудан келген, ал оны қызы Айнұр екі баласымен бірге ертіп жүр. Олар алаңға алдын ала келіп үлгерген.
Алматыдағы басты жаңажылдық шоуда қазақстандық артистердің өнер көрсетуі 1 қаңтар күні сағат 00:30-да мәресіне жетеді.