Алматыда жыл басынан бері балабақшаларда 3,6 мыңнан астам жаңа орын ашылды, – деп хабарлайды aqshamnews.kz тілшісі.
2026 жылдың басынан бері Алматыда 46 жаңа балабақша ашылып, балалар үшін 3 627 қосымша орын құрылды. Бұл туралы қалалық Білім басқармасының өкілдері айтты.
Бұл кезеңде 730 орындық 4 мемлекеттік балабақша және жалпы сыйымдылығы 2 897 орын болатын 42 жекеменшік мектепке дейінгі ұйым жұмысын бастады.
Бүгінде Алматыда 1 098 балабақша жұмыс істейді. Оларға 87 мыңнан астам бала барады.
Қалалық Білім басқармасының өкілдерінің мәліметінше, жыл аяғына дейін тағы 16 мектепке дейінгі ұйымды – 5 мемлекеттік және 11 жекеменшік балабақша ашу жоспарланып отыр. Бұл екі жастан алты жасқа дейінгі балаларды балабақшамен қамту деңгейін 96,6%-ға дейін жеткізіп, кезекті едәуір қысқартуға мүмкіндік береді.