2026 жылғы 5 маусымда Алматы қаласы білім басқармасының «№11 бөбекжай-балабақшасы» КМҚК базасында Дүниежүзілік қоршаған ортаны қорғау күніне арналған қалалық семинар өтті, – деп хабарлайды aqshamnews.kz тілшісі.
Іс-шараның мақсаты – мектепке дейінгі ұйымдарда экологиялық тәрбие тәжірибесін жетілдіру, балалардың табиғатқа ұқыпты қарауын қалыптастырудың инновациялық әдістерін насихаттау, сондай-ақ «Жасыл балабақша» жобасы аясында тиімді тәжірибені тарату.
Семинарды Алматы қаласы Білім басқармасының Әдістемелік орталығының Қалалық мектепке дейінгі ресурстық орталығы ұйымдастырды.
Семинардың міндеттеріне мектеп жасына дейінгі балаларды экологиялық тәрбиелеудің заманауи тәсілдерімен таныстыру, балалардың табиғатқа деген қызығушылығын және оған қамқорлық сезімін дамыту кірді.
Ұйымдастырушылар экологиялық мәдениетті қалыптастыру бойынша тәжірибе алмасу, сондай-ақ ата-аналар, педагогтер мен балалар арасындағы экологиялық әріптестікті нығайту мақсатында қаланың мектепке дейінгі ұйымдарының педагогтері үшін алаң құрды. Алмалы аудандық білім бөлімінің мобильді тобының мүшесі, «№22 бөбекжай» КМҚК әдіскері Мадина Әлиеваның айтуынша, қатысушылар сапалы іс-шараны ұйымдастырғаны үшін алғыстарын білдірді.
Жоба жетекшісі, ҚМдРО әдіскері Жанар Тұралина атап өткендей, семинар мектепке дейінгі білім берудегі экологиялық күн тәртібінің қажеттілігін және педагогтердің өзекті тәжірибелерді енгізуге дайындығын көрсетті.