Алматы қаласында «Жас сақшы» полиция сыныбы оқушыларына экстремизм мен терроризмнің алдын алу бағытында профилактикалық дәріс ұйымдастырылды. Іс-шараны Алматы қаласы Полиция департаментінің экстремизмге қарсы іс-қимыл басқармасының қызметкерлері «Шапағат» деструктивті діни ағымдардан жапа шеккендерге көмек көрсету орталығы» қоғамдық қорының теолог маманымен бірлесіп өткізді.
Дәрістің негізгі мақсаты – жастар арасында экстремистік және террористік идеологиялардың таралуына жол бермеу, сондай-ақ оқушылардың құқықтық және діни сауаттылығын арттыру.
Кездесу барысында оқушыларға радикалды идеологиялардың қоғамға тигізетін кері әсері, деструктивті діни ағымдардың негізгі белгілері және олардың ықпалына түсіп қалмаудың жолдары жан-жақты түсіндірілді. Сонымен қатар, интернет желісіндегі күмәнді ақпараттардан сақтану, әлеуметтік желілердегі қауіпсіздік шараларын сақтау және құқықтық жауапкершілік мәселелері кеңінен сөз болды.
Профилактикалық шаралар қала аумағындағы бірнеше білім беру ұйымдарында ұйымдастырылып, оқушылармен ақпараттық-түсіндіру жұмыстары жүргізілді. Мұндай кездесулер жасөспірімдердің санасын теріс идеологиялардан қорғауға және олардың азаматтық жауапкершілігін қалыптастыруға бағытталған.