Алматыда заңсыз қоғамдық тамақтану нысаны бұзылды, – деп хабарлайды aqshamnews.kz тілшісі.
Алматыда заңсыз салынған құрылыстарды анықтау және жою жұмыстары жүйелі түрде жалғасып жатыр. Бұл туралы қалалық Қала құрылысын бақылау басқармасының өкілдері айтты.
Бұған дейін Төле би көшесі, 293/1 мекенжайында ортақ пайдаланылатын аумақта заңсыз нысан анықталған. Онда қоғамдық тамақтану қызметі көрсетілген.
Тексеру барысында құрылыс заң талаптарына сәйкес келмейтіні белгілі болғаннан кейін Қала құрылысын бақылау басқармасы инспекторлары нысан иесіне түсіндіру жұмыстарын жүргізіп, құрылысты қолданыстағы нормаларға сәйкестендіру қажеттігін жеткізді.
Меншік иесі заңсыз нысанды өз еркімен бұзу туралы шешім қабылдады.
Қала құрылысын бақылау басқармасы азаматтарды құрылыс жұмыстарын бастамас бұрын барлық қажетті рұқсат құжаттарын рәсімдеуге және қала құрылысы талаптарын қатаң сақтауға шақырды.