Алматы қаласындағы Alatau Creative Hub алаңында Ұлттық кітап күні мен Кітапханашылар күні қарсаңында белгілі публицист, жазушы Бигелді Ғабдуллинмен шығармашылық кездесу өтті, – деп хабарлайды aqshamnews.kz тілшісі.
Іс-шараға мәдениет және өнер қайраткерлері, кітапхана ісінің ардагерлері, әдебиетсүйер қауым, сондай-ақ еліміздің әр өңірінен келген кітапхана басшылары мен кітапханашылары қатысты.
Кездесудің басты оқиғасы – автордың «Режим и сопротивление» атты жаңа кітабының тұсаукесері болды. Аталған туындының жарық көруі қоғамдағы рухани үдерістерді терең пайымдауға жол ашатын маңызды мәдени оқиға ретінде бағаланды.
Өз сөзінде Бигелді Ғабдуллин: «Әрбір кітап – жазушы үшін туған перзентімен тең. Жаңа еңбегім жуырда ғана баспадан шығып, оқырманға жол тартты. Кітап оқу әр адамның күнделікті өмірінің ажырамас бөлігіне айналуы тиіс», – деп атап өтті.
Кездесу барысында автор шығарманың жазылу тарихына тоқталып, қазіргі қазақ әдебиетінің өзекті мәселелері төңірегінде ой бөлісті. Қатысушылар кітап мазмұнына қатысты пікірлерін білдіріп, автормен мазмұнды әрі ашық пікір алмасуға қатысты.
Шалқар радиосының редакторы, журналист Бақыт Жағыпарұлы жаңа туындының қоғамдық маңызын жоғары бағалады:
«Бүгінгі Ұлттық кітап күнінде осындай салмақты туындының оқырманға жол тартуы — үлкен рухани оқиға».
Аталған әдеби кездесу мерекелік күндердің мазмұнын байытып, Ұлттық кітап күнінің рухани мәнін тереңдете түсті.