Түркия Республикасының Алматы қаласындағы Бас консулдығы мен Еуразия ғылыми-зерттеу институты бірлесіп «15 шілде – Демократия және Ұлттық бірлік» күні атты панель өткізді.
Басқосуда Бас консул Эврен Мүдерісоғлу, Ахмет Ясауи университетінің Өкілетті кеңесінің төрағасы, профессор доктор Мұхиттин Шимшек, Еуразия ғылыми-зерттеу институтының директоры Суат Бейлур, Түркі дүниесі Жазушылар Одағының төрағасы Ұлықбек Есдәулет, Жазушылар Одағы Басқармасының хатшысы Қансейіт Әбдезұлы сынды ғалым-зерттеушілер, зиялы қауым және БАҚ өкілдері қатысты.
Бас консул Эврен Мүдерісоғлу 2016 жылдың 15 шілдесінде Түркияда болған ауыр оқиға – әскери төңкеріс әрекетінің себептері мен салдарын жан-жақты атап өтті.
«15-шілде – тек Түркия халқы үшін ғана емес, бүкіл демократиялық қоғамдар үшін үлкен сын сағаты болды. ФЕТО лаңкестік ұйымының мемлекеттік төңкеріс жасауға бағытталған әрекеті – халық еркіне, заңдылыққа, ұлттық егемендікке қарсы жасалған қастандық еді. Алайда түрік халқы сол түні бірлік пен батылдықтың жарқын үлгісін көрсетті. Көшеге шығып, ешбір қаруға сүйенбей, тек жүректегі сеніммен өз мемлекетін, өз демократиясын қорғап қалды»,-деп атап өтті.
Ахмет Ясауи университетінің Өкілетті кеңесінің төрағасы, профессор доктор Мұхиттин Шимшек қиын-қыстау сәтте бауырлас елдердің қастарынан табылғанын айрықша атап өтті. Бұл қаралы оқиғадан кейін Түркияға алғаш болып мемлекеттік сапарды Қазақстан Президенті жасағанына тоқталды.
Жазушылар Одағы Басқармасының хатшысы Қансейіт Әбдезұлы «Бұл оқиға бізге демократияның, заң үстемдігінің және ұлттық бірліктің қаншалықты қымбат құндылық екенін тағы бір мәрте еске салады.15 шілде оқиғасынан болсын, бізде болған Қаңтар оқиғасынан болсын үлкен сабақ алуымыз керек»,-деді.
Жиынға қатысқандар төңкеріс әрекетіне қарсы тұрып, өмірін қиған барлық азаматтардың рухына тағзым ете отырып, демократия мен еркіндік жолындағы күрес – мәңгілік құндылық екенін атап өтті.