Алматы өңірлік туристік хаб ретіндегі мәртебесін күшейтіп, креативті индустрияны дамытуға басымдық беріп отыр, – деп хабарлайды aqshamnews.kz тілшісі.
Almaty Tourism Bureau ұйымдастырған креативті сектор өкілдері мен туроператорлардың кездесуі жаңа туристік өнімдер қалыптастыруға серпін берді.
Іс-шараға суретші, продюсер, IT-маман және туроператор сынды 70-тен астам қатысушы жиналып, заманауи туристік тәжірибе құруға ниет білдірді. Ұсынылған жобалар болашақта креативті бағыттар, иммерсивті кеңістіктер мен ерекше мәдени іс-шараларға айналып, тіпті тәжірибелі саяхатшыларды да таңғалдыра алады.
Нетворкинг алаңы идеялар шоғырланған ортаға айналып, қатысушылар бірлескен жобаларды жүзеге асыру, жаңа туристік өнімдер әзірлеу және креативті нысандарды қала инфрақұрылымына енгізу жолдарын талқылады. Бұл жай ғана пікір алмасу емес, нақты бастамалардың іргетасы.
«Қаланы мәдениет арқылы таныту — туризмге шынайылық пен бірегейлік береді», - деді Esentai Gallery директоры Тоғжан Сақбаева мәдени кеңістіктердің маңызын ерекше атап.
Нақты деректер де бұл бағыттың әлеуетін көрсетеді: бүгінде Алматыда креативті индустрияның 4 518 субъектісі жұмыс істейді, ал 368-ден астам туроператор осы бастамаларды нақты туристік өнімдерге айналдыруға дайын. Бұл жаңа тарту нүктелерін қалыптастырып, саланың қарқынды дамуына жол ашады.
Бүгінгі Алматы туризм мен креативті экономиканың тоғысқан нүктесі. Осындай синергия қалаға бірегей, бәсекеге қабілетті әрі эмоциялық тұрғыдан бай туристік өнімдер ұсынуға мүмкіндік беріп, әлемнің түкпір-түкпірінен келетін саяхатшылардың қызығушылығын арттыра түседі.