Алматы қаласы Ішкі саясат басқармасы Қоғамдық даму орталығының бастамасымен «Таза қала» жобасы аясында «Таза аула» экомобиль акциясы ұйымдастырылды, – деп хабарлайды aqshamnews.kz тілшісі.
Акцияның мақсаты – тұрғындардың экологиялық мәдениетін арттыру, қоршаған ортаға жауапкершілікпен қарауға шақыру және қала тазалығын сақтауға үлес қосу.
Іс-шара аясында жасанды интеллект көмегімен экологиялық тақырыпта әзірленген бейнероликтер байқауы – «Ecomind» байқауының жеңімпаздарын марапаттау рәсімі өтті.
Байқау экологиялық мәселелерге қоғам назарын аударуға, қоршаған ортаны қорғау идеясын насихаттауға және жастардың шығармашылық әлеуетін дамытуға бағытталған. Қатысушылар жасанды интеллект мүмкіндіктерін пайдалана отырып, табиғатты қорғау, қалдықтарды сұрыптау және тазалықты сақтау тақырыптарында бейнероликтер әзірледі.
Акцияға еріктілер мен колледж және жоғары оқу орындарының студенттері белсенді қатысып, экологиялық бастамаларды қолдауға өз үлестерін қосты. Олар қала тазалығын сақтау, қоршаған ортаны қорғау және тұрғындар арасында экологиялық мәдениетті қалыптастыру бағытында бірлескен жұмыстар жүргізді.
Іс-шара барысында қалдықтарды сұрыптау бойынша шеберлік сабағы өткізіліп, төтенше жағдайлар қызметінің өкілдері қауіпсіздік ережелерін түсіндірді.
Акция соңында еріктілер мен басқа да қатысушылар тұрғындармен бірлесіп, жалпы қалалық сенбілікке қатысты. Олар аумақты тазалау жұмыстарына атсалысып, қаланың экологиялық жағдайын жақсартуға үлес қосты.
Таза қала – ортақ жауапкершілік! Алматыны бірге таза ұстайық!