Алматыда жастар арасында құқықтық сауатты арттыру мақсатында сталкингтің зияны мен оның салдарына арналған ақпараттық кездесу өтті, деп хабарлайды Aqshamnews.kz тілшісі.
«Заң мен тәртіп» қағидатын ілгерілету аясында Алматы қаласы Ішкі саясат басқармасының Қоғамдық даму орталығы Алматы технологиялық колледжімен бірлесіп, студенттерге арналған арнайы кездесу ұйымдастырды.
Іс-шара барысында сталкингтің алдын алу, құқықтық жауапкершілік және азаматтардың қауіпсіздігін қамтамасыз ету мәселелері талқыланды. Кездесуге Әуезов және Алатау аудандарының полиция қызметкерлері қатысып, студенттерге жүйелі түрде аңду мен қудалаудың қылмыстық іс санатына жататынын түсіндірді.
Сондай-ақ жастарға мұндай деструктивті әрекеттерден қорғану жолдары айтылып, заңнама аясында кеңестер берілді.
Кездесу кезінде студенттер өздерін толғандырған сұрақтарын қойып, құқықтық мәдениетті арттыруға бағытталған маңызды ақпарат алды. Мамандардың айтуынша, мұндай іс-шаралар жастар арасында заңға құрмет пен құқықтық сананы қалыптастыруға ықпал етеді.