Алматы қаласы бойынша қылмыстық-атқару жүйесі департаменті №13 мекемесіндегі сотталғандар арыз-шағымдарын Бас прокуратураның ақпараттық жүйесімен интеграцияланған терминалдары арқылы электронды форматта бере алады, деп хабарлайды Almaty-akshamy.kz Polisia.kz-ке сілтеме жасап.
Жуырда Алматы қаласы Түрксіб аудандық прокуратурасының өкілдері аталған мекеме сотталғандарымен кездесу өткізіп, оларға арыз-шағымдарды кедергісіз беру және онлайн заңгерлік кеңестер алу алгоритмін түсіндірді.
«Алматы қаласы бойынша ҚАЖД-ға қарасты №13 мекемесі - қауіпсіздігі төмен мекеме. Мұнда сотталғандарды ұстау тәртібі арнайы заң бойынша бекітілген. Арыз-шағымды электронды түрде терминал арқылы беру бұрыннан қолданылып келе жатқан әдіс. Ал мекемеге жаңадан келген сотталғандарға жоғарыдағыдай түсіндіру жұмыстары ұдайы жүргізіліп отырады», – дейді Алматы қаласы бойынша ҚАЖД-ға қарасты №13 мекемесінің бастығы Е.Жекенов.
Қылмыстық-атқару жүйесіне цифрлық технологияларды енгізудің өзектілігін арттыру мақсатында ұйымдастырылған кездесу кезінде терминалдармен жұмыс істеу барысында туындайтын проблемалық мәселелер де талқыланып, сотталғандар терминалдардың жұмысын жақсарту бойынша өз ұсыныстарымен бөлісті.