Алматы мәслихатының кезектен тыс сессиясында орфандық патологиясы бар тұрғындарды дәрімен қамтамасыз ету мақсатында аурулар мен дәрілік препараттар тізімін кеңейту туралы шешім қолдау тапты. Бұл жайт соңғы жылдары мұндай жағдайдың күрт артуына байланысты қаралып отыр.
Алматы қаласының Қоғамдық денсаулық сақтау басқармасын уақытша басқаратын Ләйлә Иманғалиева бұл үдерістің бұрын-соңды болмаған қарқынмен өсіп отырғанын атап өтті:
«2017 жылы сирек диагнозы бар небәрі 140 пациент болса, бүгінде олардың саны 4 287-ге жетті».
Сондықтан тіршілік үшін маңызды препараттар тізімін кеңейту – жай ғана қолдау шарасы емес, заманауи дәрілерге мұқтаж тұрғындардың өмір сапасын сақтау үшін маңызды қадам болып отыр.
«Көп жағдайда бұл – ауруды бақылап, еңбекке қабілеттілікті сақтаудың әрі мүгедектікке әкелетін асқынулардың алдын алудың жалғыз жолы», – деді Ләйлә Иманғалиева.
Қабылданған шешімнің маңызды тұсы – тізімге енгізілген әрбір препарат нақты пациенттердің медициналық қажеттілігіне негізделген.
«Әрбір санның артында қиын жағдайда қалған нақты адамдар мен олардың отбасылары тұр. Біз оларды емдеуге қолжетімділікпен қамтамасыз етуіміз керек», – деді басқарма өкілі.
Қолдау шаралары ауыр аутоиммундық, неврологиялық және гастроэнтерологиялық диагнозы бар қала тұрғындарын да қамтиды. Бұл санаттағы пациенттерге жаңа буындағы инновациялық дәрілер қажет.
Депутаттар мақұлдаған қаржыландырудың негізгі мақсаты – денсаулығы қымбат әрі қолжетімділігі күрделі препараттарға тікелей тәуелді науқастарды тұрақты дәрілік терапиямен қамтамасыз ету.
Ләйлә Иманғалиеваның айтуынша, бұл шешім көру қабілетінің жоғалуын, ауыр неврологиялық асқынуларды, жүйелі аурулардың өршуін, сондай-ақ сирек патологиясы бар балаларда тұрақты парентералды қоректену қажеттілігін болдырмауға мүмкіндік береді. Қабылданған шаралар мегаполисте емді үздіксіз жүргізуге және әлеуметтік қолдау жүйесін одан әрі нығайтуға жағдай жасайды.