Алматыда аптап ыстыққа байланысты су айдындарында қауіпсіздік шаралары күшейтілді. Құтқарушылар шомылуға тыйым салынған аумақтарда күн сайын рейд жүргізіп, тұрғындарға түсіндіру жұмыстарын жүргізіп жатыр, деп хабарлайды Aqshamnews.kz Almaty.tv арнасына сілтеме жасап.
Мамандардың айтуынша, жаз мезгілінде демалушылар көп баратын орындардың бірі – Сайран көлі. Алайда мұнда шомылуға әлі де тыйым салынған. Себебі су астында терең шұңқырлар, күрт өзгеретін тереңдік пен тік еңістер бар. Осыған қарамастан кейбір тұрғындар тыйымға қарамастан суға түсуді жалғастыруда.
Құтқарушылар тәулік бойы су айдынын бақылап, жағалау бойында күнделікті патрульдеу мен профилактикалық рейдтер ұйымдастырады. Демалушыларға қауіпті аумақтарда шомылмау жөнінде ескерту жасалады.
Қауіпті орындардың бірі – Алатау ауданындағы Шаңырақ-1 шағын ауданындағы Үлкен Алматы каналы. Мұнда да шомылуға болмайды. Дегенмен ыстық күндері тұрғындар, әсіресе балалар, суға түсу үшін осы жерге жиі келеді.
Алатау аудандық төтенше жағдайлар басқармасының инженері Еркебұлан Төлеудің айтуынша, биыл шомылуға тыйым салынған орындарға 100-ге жуық ескерту белгісі орнатылған. Өйткені каналдағы ағыс өте қатты әрі су түбінің жағдайы белгісіз болғандықтан, бұл жер адамдардың өміріне қауіп төндіреді.
Жалпы Алматы қаласы мен тау бөктерінде өзендер, көлдер, каналдар мен тоғандарды қоса есептегенде 44 су айдыны бар. Оның 10-ы шомылу маусымында аса қауіпті аумақ ретінде белгіленген. Олардың қатарында Сайран көлі, Әуежай көлі, Шаңырақ шағын ауданындағы Үлкен Алматы өзені мен Есентай өзені бар.
ТЖД мәліметінше, қауіпті учаскелерде күн сайын рейдтер ұйымдастырылып, қауіпсіздік талаптарының сақталуы бақылауға алынады.
Сондай-ақ құтқарушылардың дерегінше, биылғы шомылу маусымы басталғалы Алматыда судағы жазатайым оқиғалар тіркелмеген. Ал рұқсат етілмеген орындарда шомылғандарға 7 айлық есептік көрсеткіш көлемінде, яғни 30 мың теңгеден астам айыппұл қарастырылған.