Алматыда “Заманауи қоғамдық құндылықтар жүйесі: басымдықтар мен даму келешегі” атты дөңгелек үстел ұйымдастырылды, – деп хабарлайды aqshamnews.kz тілшісі.
Бас қосуға Алматы қаласы әкімінің орынбасары Абзал Нүкенұлы, зиялы қауым өкілдері, белгілі қоғам қайраткерлері, ғалымдар, сарапшылар және қоғамдық кеңес мүшелері, сондай-ақ діни ұйымдарының өкілдері қатысты. Іс-шараның басты мақсаты - қоғамдық құндылықтарды ғылыми және сарапшылық тұрғыдан зерттеп қана қоймай, оларды қоғамдық санаға сіңірудің тиімді тетіктерін табу, азаматтық қоғам институттарының осы бағыттағы рөлін айқындау болды.
Жиын барысында Мемлекет басшысы айқындаған қоғамдық дамудың басты идеологиялық бағдарлары - «Заң мен тәртіп» қағидасы, «Адал азамат» тұжырымдамасы, «Таза Қазақстан» жалпыұлттық бастамасы, Әділетті Қазақстан, патриотизм мен жауапкершілік, отбасылық тәрбие сынды құндылықтар талқыланды.
«Алматы қашанда тұжырымдар қалыптасатын қала болған. Себебі интеллектуалдық жағынан әлеуеті өте жоғары. Мегаполисте 100-ден астам іргелі университтер орналасқан. Екіншіден, бұл жастар қаласы - 700 мыңнан астам жас азамат тұрады. Өздеріңіз білесіздер, Мемлекет басшысы Қасым-Жомарт Тоқаев ұлттық құндылықтарымызды қалыптастыру, ұлттық бірегейлігімізді нығайтудың басты тірегі — бұл тарихымызда, тілімізде, мәдениетіміз бен салтымызда екенін айрықша көңіл бөліп келеді. Біз дәстүрлі құндылықтарымызды қазіргі заманның үрдістерімен біріктіруіміз керек екенін біліп отырмыз. Сондықтан да біз қоғамды жаңа мәдениетке, сапалы құндылықтарға, ұлттық сана мен азаматтық жауапкершілікке тәрбиелеуге ерекше көңіл бөлуіміз керек, - деді Алматы әкімінің орынбасары Абзал Нүкенов.
Ал Қазақстан Жазушылар одағының төрағасы Мереке Құлкенов қазақ халқының салт-дәстүрі мен әдет-ғұрпын ұлттың рухани конституциясына теңеді. Оның айтуынша, бұл құндылықтар бүгінде қоғамды ұйыстырып тұр әрі мемлекеттің заңды тірегіне айналған.
«Бүгінгі бас қосуымыздың елдігіміздің рухани тұтастығы мен мемлекеттілік санасын нығайту үшін маңызы өте зор. Ұлы даланың тарихи сабақтастығы конституциялық құндылықтар арқылы Тәуелсіз Қазақстанның рухани, тарихи және құқықтық негіздерін күшейтетін аса маңызды мәселе. Біздің ұлттық болмысымыз, тіліміз, дініміз және дәстүрлі құндылықтарымыз мемлекеттің қорғауындағы басты байлық. Қазақ халқының сан ғасырлық салты, дәстүрі мен әдет-ғұрпы — ұлттың рухани конституциясы іспетті. Үлкенге құрмет көрсету, кішіге ізет білдіру, ата-ананы ардақтау, ақсақалдың батасын алу, парызды жүктеу, үлкеннің алдын кесіп өтпеу, қонақты төрге шығару, сөзге тоқтау, жеті атасын білу, туған жерін қасиеттеу — халқымыздың тәрбиелілігінің алтын өзегі. Бұл құндылықтар ұлтты ұйыстырады, қоғамдағы таптық пен келісімді сақтайды», - деді Мереке Құлкенов.
Дөңгелек үстелде Философия, саясаттану және дінтану институттың директоры Айгүл Сәдуақасова «Адал азамат» қағидасына тоқталып, оның маңыздылығы туралы сөз қозғады. Оның айтуынша, бұл қағида бүгінде ішкі моральдық мотивацияға негізделген тұлғаның заманауи моделін білдіреді.
«Оның басты мақсаты — адалдықты, жауапкершілікті, заңды құрметтеуді және қоғамдық игілікке қызмет етуді басшылыққа алатын азаматты тәрбиелеу», - деді Айгүл Сәдуақасова.
Сонымен қатар, ол «Адал азамат» қағидасы қазақ философиясының интеллектуалды мұрасына, соның ішінде Абайдың «Толық адам» іліміне сүйенетінін атап өтті.