Астана және Қазақстан митрополиті Александр Алматы қаласында Рождество мерекесіне орай өтетін діни рәсімдердің басталу уақыты туралы айтты, деп хабарлайды aqshamnews.kz
— Қазақстанда Ислам дінінің Ханафи мәзһабы мен Православиелік христиандықтың мерекелерін тойлау дәстүрі ежелден қалыптасқан. Иса Мәсіхтің туған күнін тойлау кезінде біз бейбітшілік пен достықтың өркендеуін, дұшпандық пен зұлымдықтың жойылуын тілеп, дұға етеміз, — деді митрополит.
Алматы қаласындағы негізгі Рождество құлшылықтары 28 гвардияшы-панфиловшылар атындағы саябақта орналасқан Вознесенск кафедралы шіркеуінде өтеді. Мерекелік шаралар қаңтардың 6-сынан 7-сіне қараған түні сағат 23:00-де басталады.
Керек дерек
Рождество — христиан әлеміндегі ең басты мерекелердің бірі. Ол Иса Мәсіхтің дүниеге келуін атап өтеді. Православ шіркеуінің дәстүріне сай, мереке 7 қаңтарда атап өтіледі. Мерекелік құлшылықтар, дұғалар және жарық шырақ жағу рәсімдері бейбітшілік пен мейірімділікті дәріптеуге бағытталған.