Ұлттық орталық музейде мәдениет саласының үздігі, суретші, мүсінші, карикатурашы Қали Қораласбаевтың "Киелі мекен" атты жеке шығармашылық көрмесінің ашылуы өтті.
Аталмыш көрме 25 қазан – Республика күніне, Шу ауданының 95 жылдығына және өнер иесінің 60 жасқа толған мерейтойына орай ұйымдастырылды.
Жиында Алматы қаласы Мәдениет басқармасы басшысының орынбасары Арман Халбеков суретшінің еткен ерен еңбегін тілге тиек етіп, мерейтоймен құттықтады.
Суретші Қали Қораласбаевтың айтуынша, "Киелі мекен" көрмесінің негізгі мақсаты – Қазақстанның бейнелеу өнерін дамыту, ұлттық мәдениет пен рухани құндылықтарды жаңғырту, сондай-ақ көрерменге туған жер тарихының көркем бейнесін паш ету. Автор өз шығармалары арқылы адамның туған жерге деген сүйіспеншілігін, рухани тамырын және ұлттық бірегейлікті көркемдік тілмен жеткізуді мақсат еткен.
"Киелі мекен" деп атауыма себеп болған – ата-бабамыздың қаны, аналарымыздың көз жасы тамған тарихи жерім. Адам үшін өз туған жерінің әр бұтасы, әр тасы киелі. Көрмеге барлығы 150-ге тарта еңбек қойылған. Майлы бояу, акваерльмен салынған суреттерден бөлек, тас мүсіндерді де көрермен назарына ұсынуды жөн көрдім. Ұсынылған еңбектің көбі 2022–2025 жылдар аралығында жинақталғанымен, арасына 1990 жылдардағы жұмыстарымды да қостым. Ендігі арманым – жұртына адал қызмет ететін шәкірттер тәрбиелеу", – деді Қали Қораласбаев.
Өмірін өнер мен шәкірт тәрбиесіне арнаған Қали Қораласбаев – ел мәдениетіне елеулі үлес қосып келе жатқан тұлға. Ол көп жылдар бойы Жамбыл облысы Шу ауданындағы "Балалар мен жасөспірімдер орталығында" қызмет атқарып, болашақ суретшілердің дарынын ашып, олардың шығармашылық ізденісіне бағыт-бағдар беріп келеді. Оның шәкірттері бүгінгі таңда түрлі республикалық, халықаралық байқауларда жеңімпаз атанып, ұстаз еңбегінің жемісін паш етуде.
Көрмедегі суреттер қатарынан табиғи тас пен ағаштан ойылған мүсіндер, кескіндеме және графикалық жұмыстарды бірден аңғаруға болады. Әр туындыда автор туған елдің тарихы мен табиғатын, халқымыздың салт-дәстүрі мен қазақ халқының рухани болмысын өнер тілімен шебер өрнектеген.
Айта кетейік, Қали Қораласбаевтың еңбектері еліміздің жетекші мәдени ошақтарының қорында сақтаулы. Табиғи тастан жасалған "Абыз" атты туындысы Қазақстан Республикасының Ұлттық музейінде, ал "Ана – Жер Ана" мүсіні Ә.Қастеев атындағы Ұлттық өнер музейінде, "Желтоқсан желі – 86" еңбегі Жамбыл облыстық музей қорын толықтырған. Бұл туындылар суретшінің ел руханиятына қосқан зор үлесінің айғағы іспетті.
Суретші бұған дейін де республика бойынша бірнеше жеке көрмелерін өткізген. Әулиеата жерінде ұйымдастырылған "Тәуелсіздік – ел тұғыры", "Ақ мекен", "Жемқорлық – жегіқұрт" атты шығармашылық көрмелері көрерменнің жоғары бағасына ие болып, қоғамдағы өзекті мәселелерді өнер тілімен жеткізудің үлгісі болды.
Ал "Киелі мекен" көрмесі – тек суретшінің шығармашылық жетістіктерінің мерекесі емес, туған жердің тарихы мен киесін дәріптейтін, өнер мен рухани құндылықты ұштастыратын үлкен мәдени шара болды.