Алматыда қалалық полиция департаментінің 150 қызметкері донор атанды, деп хабарлайды aqshamnews.kz.
Polisia.kz мәліметінше, республикалық қан орталығында ұйымдастырылған игі шара – көмекке мұқтаж жандарға қолдау білдіруді мақсат еткен. Бұл бастама – полиция қызметкерлерінің өз мамандығына ғана емес, адам өміріне деген жанашырлығын, азаматтық борышын терең түсінетінін айқын аңғартты.
– Халыққа қызмет ету – құр ұран емес. Донор болу – мейірімділік пен адамгершіліктің шынайы көрінісі. Біз осындай игі әрекетіміз арқылы жастардың бойына жауапкершілік сезімін ұялатқымыз келеді. Полиция қызметкері болу – бұл тек тәртіп күзету ғана емес, ең әуелі елдің тыныштығы мен әр адамның өміріне қамқор болу деген сөз, – деді Алматы қалалық полиция департаменті бастығының орынбасары Әділғожа Құсайынов.
Бұл іс-шара "Полиция – Заң мен Тәртіпті күзетеді" ұранымен, сондай-ақ елімізде жарияланған "Профилактика жылы" мен Қазақстан полициясының мерейтойына арналған жоспар аясында өтті.