Алматыда пойыз билеттерін сатып, жолаушыларға заңсыз қызмет ұсынған делдалдар ұсталды.
Жұрт билет таппай, сабылып жүрсе, кей пысықтар мұны табыс көзіне айналдырған. Жылда жаз мезгілінде қайталанатын бұл жағдайға тосқауыл болмай тұр. Пойыздарға билет жоқ, деп хабарлайды almaty-akshamy.kz 24.kz-ке сілтеме жасап.
Қазақстандықтар баратын жеріне уақытылы жету үшін ертерек қамдануды әдетке айналдырған. Ал шұғыл жолға шығуы керек адамдар касса табалдырығын тоздырып жүр.
Мұндай кезді пысықайлар ұтымды пайдаланады. Олар вокзалға келген көпшілікке "көмегін" ұсынып, пайда көріп жүр. Жақында Алматыда осындай заңсыз қызметпен айналысқандар ұсталды.
Нариман Дүйсекеев, «Жолаушылар тасымалы» АҚ ресми өкілі:
Қазір 15 цифрлық платформа арқылы билет сатып алуға болады. Одан бөлек билет.рейлуейс.кз сайтында ешқандай комиссиясыз жол жүру құжаты сатылады. Егер сіз қалаған бағытта билет болмаса күту парағына тіркеле аласыз. Кезекке жолға шығудан жеті күн бұрын, тіпті бірнеше сағат қалғанда да тұруға болады. Жыл басынан бері 17 мың билет осы күту парағы арқылы сатылды.
Жауаптылардың айтуынша, билеттің болмауына вагон тапшылығы басты себеп. Қазір ұлттық тасымалдаушының 2150 вагоны бар. Оның 450-і ескірген. 2030 жылға дейін паркті 90 пайыз жаңартуды жоспарлап отыр. Бұл бағытта отандық және шетелдік компаниялармен келісімдер жасалды.