2026 жылдың басынан бері Алматыда мүліктік қылмыстардың саны 23%-ға азайды, – деп хабарлайды aqshamnews.kz тілшісі.
Пәтерлер мен автокөліктерге заңсыз кіру, ұялы телефондарды ұрлау және қалта ұрлығы деректері айтарлықтай төмендеген. Сонымен қатар, полиция жаз мезгілінде велосипед, самокат және мопед ұрлығы көбейетінін ескертіп, тұрғындарды жеке мүлкіне қатысты қырағы болуға шақырады. Бұл туралы Өңірлік коммуникациялар қызметінде өткен баспасөз мәслихатында Алматы қаласы Полиция департаментінің ресми өкілі Салтанат Әзірбек мәлімдеді.
Полиция мәліметінше, меншікке қарсы қылмыстардың негізгі түрлері бойынша оң динамика байқалады. Атап айтқанда, пәтер ұрлығының саны 26%-ға, автокөліктерден жасалған ұрлықтар 34%-ға, қалта ұрлығы 7,7%-ға, ал ұялы телефондарды заңсыз иемдену жағдайлары 18%-ға төмендеген.
Спикердің айтуынша, қылмыс деңгейінің төмендеуі - полицияның жедел және саптық бөлімшелерінің кешенді жұмысының, сондай-ақ құқық бұзушылықтардың алдын алуға бағытталған заманауи тәсілдерді енгізудің нәтижесі.
«Біздің міндетіміз - қылмыстарды ашумен қатар, олардың алдын алу. Сондықтан профилактикалық жұмыстарға, криминогендік ахуалды талдауға және туындауы мүмкін қауіп-қатерлерге дер кезінде ден қоюға ерекше көңіл бөлінеді. Осындай тәсіл қаладағы ұрлық санының тұрақты төмендеуіне ықпал етіп келеді», - деді Салтанат Әзірбек.
Жыл басынан бері полицейлер бөтеннің мүлкін ұрлауға маманданған алты қылмыстық топты ұстады. Олардың құрамында шамамен 50 қылмыстық эпизодқа қатысы бар деген күдікке ілінген 36 адам болған.
Жалпы мүліктік қылмыстар азайғанымен, жаз мезгілінде Алматыда велосипед, мопед және самокат ұрлығы көбейеді. Мұндай жағдайлардың көбі иелерінің салғырттығынан орын алады. Олар көліктерін қараусыз қалдырып, бекітпейді немесе адам сирек жүретін жерлерге қояды.
Осыған байланысты алматылықтарға қарапайым қауіпсіздік шараларын сақтау ұсынылады: сенімді құлыптарды пайдалану, мүлікті қауіпсіз орындарда сақтау, сондай-ақ мүмкіндігінше бейнебақылау жүйелерін орнату.
Қазіргі уақытта құқық бұзушылықтардың алдын алу мен оларды ашуда бейнебақылау камераларының рөлі ерекше. Полиция департаментінің мәліметінше, жыл басынан бері Алматыдағы қалалық бейнебақылау жүйелерінің көмегімен бөтеннің мүлкін ұрлауға қатысты үш мыңға жуық қылмыс ашылған.
«Бейнебақылау камералары құқық бұзушылық жасаған адамдарды жедел анықтауға және олардың әрекеттерін тіркеуге мүмкіндік береді. Сонымен қатар, камералардың болуы қылмыстың алдын алуға да ықпал етеді, өйткені құқық бұзушылар өз әрекеттерінің назардан тыс қалмайтынын біледі. Сондықтан қалалық бейнебақылау жүйесін дамыту және оған жеке камераларды қосу жұмыстары біздің басты бағыттарымыздың бірі болып қала береді», – деді Салтанат Әзірбек.
Полиция құқық бұзушылықтардың алдын алу тек құқық қорғау органдарының ғана емес, бүкіл қоғамның ортақ міндеті екенін атап өтті. Сондықтан тұрғындардың өз мүлкіне ұқыптылықпен қарап, сақтық шараларын ұстануы маңызды. Алматыда «Заң және тәртіп» қағидаты аясында ұрлықтың алдын алу және қоғамдық қауіпсіздікті арттыру жұмыстары жалғасады.