17 наурыз күні Абай атындағы Қазақ ұлттық опера және балет театрында би өнерінің жанкүйерлері ыстық ықыласпен қарсы алған «Лазги. Жан мен махаббат биі» балетінің қойылымы өтті. Қойылымды «Өзбекстанның ұлттық балеті» труппасы ұсынды.
Кештің құрметті қонақтары қатарында Қазақстан Республикасы Мемлекеттік кеңесшісі Ерлан Қарин, Өзбекстан Республикасы Президентінің бірінші көмекшісі Саида Мирзиёева, Қазақстан Республикасының Мәдениет және ақпарат министрі Айда Балаева, Алматы қаласының әкімі Ерболат Досаев болды.
Ташкенттен Алматыға дейін
Балеттің тұсаукесері 2021 жылы Ташкентте өтті. Халықаралық премьерасы Дубай опера сахнасында қойылып, кейін Париж, Лондон, Мәскеу, Бейжің, Баку және Стамбул қалаларында көрсетілді.
Белгілі неміс хореографы және балетмейстері Рауль Раймондо Ребек қойған бұл ерекше қойылым Лазги биіне арналған. Бұл ежелгі халық биі ЮНЕСКО-ның адамзаттың материалдық емес мәдени мұрасының бір бөлігі ретінде мойындалған. Үш мың жылдық тарихы бар бұл би халықтың даналығы мен ұлттық дәстүрлерінің рухын бейнелейді. Күрделі қимылдардың, ерекше стильдің және қуатты энергетиканың үйлесуі бұл биді нағыз мәдени феноменге айналдырады.
Қойылым көрермендерді Ұлы Жібек жолы бойымен Орталық Азияны кесіп өткен керуендер заманындағы алыс өткен шаққа жетелейді. Шөл даланың аптап ыстығында, шамандық әуендердің сиқырлы ырғағымен Махаббат дүниеге келіп, Мәңгілік Жан өзінің шексіз биін бастайды. Бұл жол – өткеннен бүгінге дейінгі көпғасырлық дәстүрлер мен халық рухының ұрпақтан-ұрпаққа жалғасуын бейнелейді.
Келесі қойылым – Астанада
Балет Өзбекстанның Мәдениет және өнерді дамыту қорының (ACDF) қолдауымен ұйымдастырылды. Келесі қойылым 27 наурыз күні «Астана Опера» театрында өтеді.
Шығармашылық топ:
Идея авторы: Саида Мирзиёева
Жоба жетекшісі: Гаянэ Умерова
Либретто және хореография: Рауль Раймондо Ребек
Сценография: Йоко Сеяма
Костюм дизайнері: Фрол Буримский
Музыкалық өңдеу және композиция: Дэвидсон Джаконелло
Жарық қоюшы суретші: Тим Вацлавек
Кеңесшілер: Гүлнора Мусаева және Гавхар Матякубова