Ерлер арасында Қытайдан келген Kuwan Anubaike 1:04:10 нәтижесімен жеңіске жетіп, 2024 жылы орнатылған жарыс рекордын жаңартты, – деп хабарлайды aqshamnews.kz тілшісі.
19 сәуір күні Алматыда 44 елден 10 000-нан астам қатысушыны жинаған тоғызыншы Almaty Half Marathon өтті. «Бірінші болу - батылдық» корпоративтік қоры ұйымдастырған жартылай марафон дәстүрлі түрде Қазақстандағы ірі жүгіру іс-шаралары маусымын ашады.
Қатысушыларға дәстүрлі қашықтықтар ұсынылды: жартылай марафон (21,1 км), 10 км, 10 км (скандинавиялық жүріс) және Экиден командалық эстафетасы. Жартылай марафонға 18 жастан асқан жүгірушілер қатыса алды, ал қалған қашықтықтарға – 15 жастан бастап. Жалпы жарысқа 44 елден 10 000-нан астам адам қатысты.
Алдымен 10 км қашықтыққа және скандинавиялық жүріс қатысушылары сөреге шықты, кейін жартылай марафоншылар мен Экиден эстафетасының қатысушылары жүгірді. Бағыт Тұңғыш Президент саябағынан басталып, жабылған әл-Фараби даңғылы бойымен өтіп, Орталық стадионда аяқталды.
Ұйымдастырушылар экологиялық бағытқа ерекше назар аударды: мәре қалашығының аумағында EcoNetwork-пен бірлесіп экологиялық аймақ ұйымдастырылып, қатысушылар пластик бөтелкелер мен алюминий банкілерін тапсыра алды. Жиналған екінші шикізат қайта өңдеуге жіберіліп, интерьер заттары мен киім жасауға пайдаланылатын болады.
Қатысушылардың бір бөлігі қайырымдылық бастаманы қолдады: сөре алдында жүгірушілер турникеттерге жылы киімдерін қалдырып, «Тепло» жобасының командасы оларды жинап, сұрыптап, мұқтаж жандарға жеткізді. Жобаны жыл бойы қолдауға болады – киім қабылдау жәшіктерінің бірі Ботаникалық бақтың кіреберісінде орнатылған.
Almaty Half Marathon қатысушылар үшін жыл сайын қолайлы бола түсуде: мірелік қалашықта ана мен бала бөлмесі жұмыс істеді, ерлер мен әйелдерге арналған бөлек әжетханалар енгізілді, сондай-ақ ерекше қажеттіліктері бар адамдарға арналған арнайы кабиналар орнатылды – Қазақстандағы жүгіру жарыстарын ұйымдастырушылар арасында бұл тәжірибе алғашқылардың бірі болып енгізілді.
21,1 км қашықтықта әйелдер арасындағы абсолюттік есепте Украинадан келген Мария Мазуренко 1:15:26 нәтижесімен жеңіске жетті. Екінші орынды Ресейден келген Карина Костромина (1:16:15), үшінші орынды Қазақстандық Ксения Авдеева (1:17:21) иеленді.
Ерлер арасында Қытайдан келген Kuwan Anubaike 1:04:10 нәтижесімен жеңіске жетіп, 2024 жылы орнатылған жарыс рекордын жаңартты. Екінші орынды Өзбекстаннан Бекзод Бойматов (1:04:55), үшінші орынды Қырғызстаннан Жусуп Сулайман уулу (1:05:13) иеленді.
Айта кетейік, биыл Алматыға 821 шетелдік қатысушы (жалпы санының шамамен 8%-ы) келді, бұл жартылай марафон тарихындағы рекордтық көрсеткіш болды. Қатысушылардың басым бөлігі Қазақстан тұрғындары болғанымен, жарыстың географиясы жыл сайын кеңейіп келеді.
Қатысушылар саны бойынша алғашқы үш ел: Ресей (346), Қырғызстан (146) және Өзбекстан (81). Сонымен қатар жарысқа Қытай (37), АҚШ (32), Ұлыбритания (28), Украина (21) және Беларусь (18) елдерінің өкілдері қатысты. Іс-шара Азия, Еуропа, Солтүстік және Оңтүстік Америка, Африка және Таяу Шығыс елдерінен келген жүгірушілерді біріктірді.
Айта кету керек, спорттық туризм қаланың дамуының маңызды қозғаушы күштерінің біріне айналып келеді. Жүгіру іс-шаралары тек қатысушыларды ғана емес, олардың жақындарын — отбасы мүшелері мен достарын да тартады, бұл туристік ағынды арттырады. Қордың зерттеуіне сәйкес, өзге өңірлерден және шетелден келген қатысушылардың 79,3%-ы Алматыға қайта келуді жоспарлап отыр, яғни олар тек жарысқа ғана емес, қаланың өзі үшін де қайта оралады.
Бұл үрдісті халықаралық зерттеулер де растайды: Mastercard компаниясы мен Almaty Tourism Bureau бірлесіп дайындаған қаланың туристік әлеуетіне арналған талдауға Almaty Marathon енгізіліп, ірі іс-шаралардың туристік ағын мен шығындардың өсуіне ықпалы атап өтілген.
Сонымен қатар, белсенді демалыс форматы да өзгеріп келеді: жүгіру барған сайын қала көшелерінен тыс кеңістікке шығып, қатысушылар табиғат аясындағы бағыттарды таңдап, тауда жаттығуды жөн көреді. Бұл сұраныс біртіндеп инфрақұрылым тарапынан да қолдау табуда. Атап айтқанда, осы бағытта Алматының тау кластері қалыптасып, тауда жаттығу мен демалуға арналған мүмкіндіктер артып келеді.
Almaty Half Marathon Алматы қаласы әкімдігінің қолдауымен өтті.