Алматы қалалық №2 клиникалық ауруханасында ми тамырындағы тромбты алып тастауға бағытталған шұғыл ота сәтті өтті, – деп хабарлайды aqshamnews.kz тілшісі.
Отадан кейін науқастың неврологиялық бұзылысы толық жойылды.
1957 жылы туған науқасты ауруханаға жедел жәрдем бригадасы жеткізген. Дәрігерлер оның есі тұманданғанын, денесінің сол жақ бөлігі салданғанын және көз қимылының бұзылғанын анықтаған.
Тексеру барысында миды қанмен қамтамасыз ететін оң жақ ортаңғы ми артериясының М1 сегментінде тромб бары белгілі болды. Мұндай жағдайда қан айналымының бұзылуы ми тіндерін зақымдап, ауыр зардапқа әкелуі әбден мүмкін еді. Сондықтан науқасқа шұғыл медициналық көмек көрсету қажет болды.
Дәрігерлер рентгенэндоваскулярлық тромбэктомия жасады. Бұл - қан тамырының ішіндегі тромбты арнайы құралдардың көмегімен алып, қан айналымын қалпына келтіруге мүмкіндік беретін заманауи емдеу әдісі.
Жалпы наркозбен жүргізілген ота 30 минутқа созылды. Отадан кейін науқастың неврологиялық бұзылысы толық жойылды.
Отаға қатысқан медициналық топтың құрамында оператор Максим Аргумбаев, ассистент Дархан Жетпісбаев, анестезиолог Ринат Касенов және оталық медбике Эльмира Аюпова болды.
«Ишемиялық инсульт кезінде зақымданған қан тамырындағы қан айналымын мүмкіндігінше тез қалпына келтіру аса маңызды. Көмектің дер кезінде көрсетілуі науқастың кейінгі жағдайына тікелей әсер етеді. Бұл жағдайда диагноздың жедел қойылып, мамандардың үйлесімді жұмыс істеуінің арқасында неврологиялық бұзылысты толық жоюға мүмкіндік туды», - дейді нейрохирург Дархан Жетпісбаев.
Бұл жағдай инсульт кезінде уақтылы медициналық көмек көрсетудің және заманауи емдеу әдістерін қолданудың маңызын көрсетеді. Қан айналымын дер кезінде қалпына келтіру ауыр асқынуың алдын алуға мүмкіндік беретінін есте сақтайық.