Алматы әкімі Дархан Сатыбалды Алматыдағы Мажарстанның Бас консулы Саболч Карой Сёкемен кездесті, – деп хабарлайды aqshamnews.kz тілшісі.
Кездесу барысында тараптар Алматы мен Мажарстан арасындағы сауда-экономикалық, инвестициялық, туристік, білім беру және мәдени-гуманитарлық ынтымақтастықты одан әрі дамыту мәселелерін талқылады.
Мажарстанның Қазақстанның Еуропадағы маңызды серіктестерінің бірі екені атап өтілді. 2025 жылдың қорытындысы бойынша Алматы мен Мажарстан арасындағы тауар айналымы 106 миллион АҚШ долларына жетті. Тараптар фармацевтика, агроөнеркәсіптік кешен, жасыл технологиялар, цифрландыру және қала инфрақұрылымы салаларындағы ынтымақтастықты кеңейтудің зор әлеуеті бар екенін жеткізді.
Кездесуде инвестиция тарту және екі елдің кәсіпкерлік қауымдастықтары арасындағы іскерлік байланысты нығайту мәселелеріне ерекше назар аударылды. Сондай-ақ, туризм, білім беру және ғылым салаларында бірлескен жобаларды жүзеге асыру мүмкіндіктері қарастырылды.
Алматы мен Мажарстанның жоғары оқу орындары арасындағы академиялық ынтымақтастықтың маңыздылығы да ерекше атап өтілді. Мажарстан тарапы Stipendium Hungaricum бағдарламасы аясында қазақстандық студенттерге білім гранттарын ұсынуды жалғастырып келеді. Бұл гуманитарлық байланысты дамытуға және білікті мамандар даярлауға ықпал етеді.
Тараптар екіжақты ынтымақтастықты одан әрі кеңейтуге мүдделі екендерін білдіріп, серіктестік қарым-қатынастарды нығайтуға бағытталған жаңа бірлескен бастамаларды жүзеге асыруға дайын екендіктерін растады.
Кездесу қорытындысы бойынша өңіраралық ынтымақтастықты дамытуға, инвестициялық байланысты кеңейтуге және өзара тиімді бірлескен жобаларды ілгерілетуге деген ортақ қызығушылық тағы бір мәрте расталды.