Бүгін Қазақстанның батысында, солтүстік-батысында, орталығында, оңтүстігі мен оңтүстік-шығысында күн күрт бұзылады. Синоптиктер бұл өңірлерде қатты жаңбыр жауып, өзендердегі судың деңгейі күрт көтерілетінін ескертті. Бұл туралы Aqshamnews.kz сайты хабарлайды. «Қазгидромет» мамандары су тасқыны қаупінің күшеюіне қардың еруі мен жауын-шашынның көп мөлшерде түсуі себеп болып отырғанын айтады.
14 облыста дауылды ескерту жарияланды
Метеорологтардың дерегінше, бүгінгі күні елдің бірқатар өңірлерінде ауа райының қолайсыздығына байланысты дауылды ескерту жарияланды. Бұл қатарда Атырау, Жамбыл, Қызылорда, Маңғыстау, Батыс Қазақстан, Түркістан, Солтүстік Қазақстан, Қарағанды, Ұлытау, Ақтөбе, Қостанай, Жетісу және Ақмола облыстары бар. Негізгі қауіп факторлары – тұман, найзағай және қатты жаңбыр.
Төтенше жағдайлар министрлігі мен жергілікті әкімдіктер тұрғындарды қауіпсіздік шараларын қатаң сақтау қажеттігін ескертеді. Әсіресе, су тасқыны қаупі бар елді мекендерде эвакуация жоспары әзірленіп, бөгеттер мен су қоймаларының жағдайы қатаң бақылауға алынған.
Астана, Алматы және Шымкент қалаларындағы ауа райы
Астанада бүгін күндіз +17–19 °C, түнде +6–8 °C болады. Кей уақытта жаңбыр жауады. Желдің жылдамдығы 7–12 м/с шамасында.
Алматыда ауа температурасы күндіз +21–23 °C, түнде +11–13 °C шамасында. Таңертең және күндіз найзағайлы жаңбыр жауады, түнде жауын-шашын болмайды. Жел 5–10 м/с, найзағай кезінде 15–20 м/с дейін күшеюі мүмкін.
Шымкентте ауа райы біршама жайлырақ: күндіз +25–27 °C, түнде +11–13 °C. Жауын-шашын күтілмейді. Алайда жел күшейіп, 23 м/с дейін жетуі ықтимал.