Бірнеше жыл бұрын Алматы билігі көпдеңгейлі автотұрақ жобасын таныстырған болатын.
"Алматы паркинг" өкілдерінің айтуынша, жоба жабылған жоқ, деп хабарлайды aqshamnews.kz
"Қала әкімінің тапсырмасы бойынша, Алматының құрылыс басқармасы 2023 жылдан бастап алғашқы коммуналдық капиталды автотұрақ құрылысын аяқтауға арналған жобалау-сметалық құжаттаманы әзірлеп жатыр. Нысан "Көктем-3" шағынауданында орналасады", – деп хабарлады компания.
Жоспар бойынша автотұрақ 207 автокөлікке арналған орындарды қамтиды және қаладағы электромобильдерге арналған зарядтау станцияларымен жабдықталған алғашқы тұрақ нысаны болмақ. Алайда, өкілдердің айтуынша, негізгі мәселелердің бірі – резервтік электрмен жабдықтау қуатының жеткіліксіздігі.
"Бұл мәселені шешу үшін 2024 жылдың қазанында дизельді генераторлық қондырғы (ДГҚ) орнату туралы шешім қабылданды. Қазір ДГҚ орналасатын учаскенің актісін алу үшін жерге орналастыру жобасы әзірленіп жатыр. Сонымен қатар, сыртқы электр желілерін қосуға арналған инженерлік дәлізді қала жоспарлау және урбанистика басқармасымен келісу қажет", – деп мәлімдеді "Алматы паркинг".