«Almaty Polytechnic College» КМҚК базасында маңызды қалалық іс-шара – «Өндірістік оқытуды трансформациялау: Инновациялар, сын-тегеуріндер және даму перспективалары» атты конференция өтті.
Жұмысшы мамандықтары жылы аясында ұйымдастырылған конференцияның мақсаты – өндірістік оқыту саласындағы заманауи үрдістер мен инновациялық тәсілдерді талқылау, сонымен қатар цифрлық экономика талаптарына сай білікті мамандар даярлау сапасын арттыру бойынша ұсыныстар әзірлеу.
Іс-шараға Алматы қаласының колледж өкілдері, оқу-өндірістік жұмысы жөніндегі орынбасарлар, әдіскерлер, өндірістік оқыту шеберлері, жұмыс беруші компаниялар мен кәсіпорындардың өкілдері, сонымен қатар кәсіби білім беру саласындағы зерттеуші-ғалымдар қатысты.
Конференция барысында өндірістік оқытуды жаңа форматқа бейімдеу, инновациялық әдістерді енгізу, цифрлық технологияларды тиімді қолдану, дуалды оқытуды кеңейту сынды тақырыптар көтеріліп, мазмұнды баяндамалар жасалды. Пікірталас алаңдарында қатысушылар өзара тәжірибе алмасып, нақты шешімдер ұсынды.
«Бүгінгі күннің талабы – икемді, технологияны еркін меңгеретін, еңбек нарығына тез бейімделетін мамандарды дайындау. Ол үшін өндірістік оқыту мен кәсіптік бағдар берудің жаңа моделін қалыптастыру қажет», – деді іс-шарада сөз сөйлеген колледж директоры Медет Омарбеков.
Конференция қорытындысында кәсіби білім беруді дамытуға бағытталған ұсыныстар мен бастамалар жинақталып, тиісті ұйымдарға жолданатын болды.
Осы тектес іс-шаралар болашақ мамандардың сапалы білім алып, еліміздің индустриялық дамуына нақты үлес қосуына серпін беретіні сөзсіз.