Алматы қаласы әкімдігі жарықтандырудың шебер-жоспарын әзірледі. Құжат 2025 жылы 22 тамызда бекітілмек.
Жоспар жүзеге асқанда жыл соңына дейін жарық жүргізілмеген аумақтар, көшелер, тротуарлар мен жаяу жүргінші аймақтарына жарық тартылып, қолданыстағы жарық жүйелері заманауи талаптарға сай жаңғыртылмақ. Қала түнгі уақытта да жарқырап, тұрғындардың қауіпсіздігі мен жайлылығы арта түспек.
Жыл басынан бері Алматыда 15 мыңнан астам шам мен 5,6 мың торшер орнатылды, сыртқы жарықтандыруды басқарудың 520 шкафы жаңғыртылды. Бұған қоса, бұрын көше жарығы болмаған 200-ден астам аумақ жарықтандырылды, тоннельдер мен жолайырықтарда 150 прожектор ауыстырылды. Қаланың негізгі көшелерінде ағашты сәндік жарықтандыру үшін шамамен 1000 жарық нүктесі орнатылды. Мамыр айынан бастап 70 нысанға сәулеттік жарық беру жұмыстары қолға алынған. Сонымен қатар жаяу жүргіншілер аймақтарында қаланы көріктендіру аясында торшер шамдарын орнату басталды.
Алдағы уақытта Өңірлік коммуникациялар қызметінде «Алматы Қала Жарық» МКК басшылығының қатысуымен брифинг өткізіп, журналистермен бірге жарық мәселесі шешілген және әлі де реттелетін аумақтарға бару жоспарланып отыр.