Алматыда аумақтық дамудағы сәйкессіздікті жою мақсатында қалалық полиорталықтарды құру жұмыстары басталды. Әрбір полиорталық адамдар жиі баратын жеке орынға айналып, тұрғындарды сенімді инфрақұрылыммен қамтамасыз етеді. Бұл туралы Орталық коммуникациялар қызметінің алаңында өткен брифинг барысында Алматы қаласының әкімі Дархан Сатыбалды мәлімдеді.
"Жобаның негізінде қалалық белсенділікке арналған жаңа орталықтар құру идеясы жатыр. Полиорталықтардың даму тұжырымдамасын халықаралық сарапшылар әзірледі. Басты басымдық – "Шығыс қақпасы" мен "Батыс" полиорталықтарын қалыптастыру. Бұл аумақтарда тақырыптық ойын-сауық паркі, Алматы су арнасы, Almaty AI Park, EXPO Center, жаңа стадион және басқа да нысандарды орналастыру жоспарланған. Аталған жобаларды жүзеге асыру қала аумақтарын бірдей дамытуға, тарихи орталыққа түсетін жүктемені азайтуға және барлық аудандағы қалалық ортаның сапасын арттыруға мүмкіндік береді", - деді Алматы әкімі.
Сонымен қатар Дархан Сатыбалды Мемлекет басшысының тапсырмасына сәйкес қаланың Бас жоспарына түзетулер енгізіліп жатқанын атап өтті. Бұл ретте қаланың жоғарғы бөлігінде көпқабатты тұрғын үй салуға бұған дейін енгізілген мораторий талаптары ескерілген. Аталған құжатты биыл 24-27 желтоқсан аралығында қоғамдық талқылауға шығару жоспарланып отыр.