Алматыда GT SPORT FEST фестиваліне байланысты Төле би көшесінде көлік қозғалысы уақытша шектеледі, – деп хабарлайды aqshamnews.kz тілшісі.
Алматыда Қала күніне орай 6 қыркүйекте GT SPORT FEST спорт фестивалі өтеді. Осыған байланысты Төле би көшесінің бір бөлігінде көлік қозғалысы уақытша шектеледі.
6 қыркүйек күні сағат 00:00-ден 23:00-ге дейін Төле би көшесінің Назарбаев даңғылынан Абылай хан көшесіне дейінгі аралығында көлік қозғалысы толық тоқтатылады.
Фестивальге қатысушылар мен көрермендердің қауіпсіздігін қамтамасыз ету, сондай-ақ іс-шараны ұйымдастыру және өткізу мақсатында уақытша шектеу енгізіледі.
Жүргізушілерден бағытын алдын ала жоспарлап, көлік қозғалысы сызбасындағы уақытша өзгерісті ескеруді сұраймыз.
Айта кетейік, GT SPORT FEST фестиваліне шамамен 1000 әуесқой және кәсіби спортшы қатысады. Бағдарламада 3×3 стритбол, киберспорт, брейкинг, BMX және автошоу бар.