Алматыда газ құбыры жарылып, салдарынан көлік аударылып, бірнеше адам зардап шекті, - деп хабарлайды Aqshamnews.kz тілшісі.
Куәгерлердің айтуынша, оқиға Бұқар жырау бульварының бойында болған. Жарылыстан кейін көлік аударылып, жол жабындысы бүлінген. Айнала қоршалды. Көлік жүргізушісі мен жолаушысы ауруханаға жеткізілді.
QazaqGaz Aimaq акционерлік қоғамының мәліметінше, 16 шілдеде орта қысымды жаңадан салынған жерасты газ құбырына сынақ жүргізу кезінде, "СантехКомплектГрупп" ЖШС мердігер ұйымының жұмыстары барысында ауа қоспасы сыртқа шығып кеткен. Нәтижесінде жол жабындысы, ағаш және көлік зақымданған.
"Оқиға орнына қаланың барлық тиісті апаттық қызмет жедел жетті. Қазір учаске тексеріліп, оқиғаның себептері анықталып жатыр. Аумағы қоршауға алынды, тұрғындарға қауіп жоқ. Қаза тапқандар жоқ", – делінген ресми хабарламада.