Алматыда Еуразиялық тау курорттары альянсының үшінші фестивалі аясында Еуразиялық тау курорттары альянсы мен еуропалық Grandvalira Andorra тау курорттары желісі арасында ынтымақтастық туралы меморандумға қол қою рәсімі өтті, – деп хабарлайды aqshamnews.kz тілшісі.
Еуразиялық тау курорттары альянсының бас хатшысы Андрей Кукушкиннің айтуынша, Еуропадағы жетекші тау шаңғысы өңірлерінің бірімен әріптестікті дамыту өзара іс-қимылды кеңейтуге, тәжірибе алмасуға және саланың озық шешімдерін енгізуге жаңа мүмкіндіктер береді.
Оның айтуынша, Grandvalira Andorra-мен ынтымақтастық альянстың халықаралық байланысын нығайтып, тау курорттарын дамыту бағытындағы кәсіби диалогты жаңа деңгейге шығаруға ықпал етеді.
Құжатқа еуропалық курорт атынан Grandvalira Andorra өкілі қол қойды. Ал рәсімге Еуразиялық тау курорттары альянсы атынан Андрей Кукушкин қатысты.
Меморандумға қол қою форумның іскерлік бағдарламасындағы негізгі оқиғалардың біріне айналды. Бұл халықаралық серіктестердің тау туризмін дамытуға және кластерлік бастамаларды ілгерілетуге жоғары қызығушылық танытып отырғанын көрсетті.