AIGA грэпплинг турнирі дәстүрлі түрде Халықаралық нашақорлық пен есірткі бизнесіне қарсы күрес күніне арналған.
Турнирге Қазақстан, Қырғызстан, Өзбекстан, Біріккен Араб Әмірліктерінен 400 жас спортшы және Жанұя балалар үйінің тәрбиеленушілері қатысты.
- 26 маусым – Халықаралық нашақорлыққа қарсы күрес күні, осыған байланысты республика аумағында есірткіге қарсы іс-шаралар айлығы өткізілуде. Бүгінгі турнир де ерекшелік емес. Жалпыұлттық мәселе ретінде белгіленген ортақ мақсатқа қолдау көрсеткен ұйымдастырушыларға алғысымызды білдіреміз, - деді Алматы қалалық полиция департаменті бастығының орынбасары Олжас Мырзабеков.
Сондай-ақ шараға AIGA облыстық және қалалық грэпплинг федерациясының өкілдері, Қырғыз Республикасының джиу-джитсу федерациясының арнайы шақырылған президенті Самарбек Сабыржанұлы, сондай-ақ облыстық мәслихат депутаттары, белгілі спортшылар мен белсенді жастар қатысты. Сонымен қатар шарада ЖҚАЖ қызметкерлерінің өнері көрсетілді.
- Нашақорлық – ұлт денсаулығына төнетін үлкен қатер, Елбасы өз Жолдауында салауатты өмір салты – ең алдымен әрбір адамның өз болашағының кепілі екенін атап өтті. Осындай әрекеттердің арқасында біз болашақ ұрпақтың пікірін өзгертіп, жақсылыққа бағыттай аламыз, - деді С.Нұрмағамбетов атындағы “Sagadat Batyr” спорт клубының президенті Ерболат Тұрымбетов.
Турнирде жеңімпаз атанған спортшылар медальдармен, сыйлықтармен және кубоктармен марапатталды.