Алматы қаласында соттылығы алынбаған және өтелмеген адамдар тарапынан қайталама қылмыстардың алдын алуға бағытталған "Профилактикалық есеп" жедел-профилактикалық іс-шарасы өткізілуде, – деп хабарлайды aqshamnews.kz тілшісі.
Іс-шара 18 ақпан мен 5 наурыз аралығында өтеді. Профилактикалық жұмысқа аудандық полиция бөлімшелерінің қызметкерлері пробация қызметімен бірлесіп жұмылдырылған. Жедел іс-шара аясында полиция қызметкерлері есепте тұрған азаматтарды тұрғылықты мекенжайы бойынша тексеріп, сот белгілеген шектеулердің сақталуын бақылайды және құқық бұзушылықтардың алдын алуға бағытталған профилактикалық әңгімелер жүргізеді.
Іс-шара аясында 5000-ға жуық есептегі азамат тексерілді. Тексеру барысында белгіленген міндеттерді бұзу фактілері анықталып, бірқатар материалдар сотқа жолданды. Сонымен қатар есірткі заттарын заңсыз тұтынуға байланысты құқық бұзушылықтар үшін жекелеген тұлғалар жауапкершілікке тартылды. Алматы қаласы ПД қоғамдық қауіпсіздік басқармасы бастығының орынбасары Айтан Елеусизов профилактика қоғамдық қауіпсіздікті қамтамасыз етудің негізгі құралы болып қала беретінін атап өтті.
– Іс-шараның басты мақсаты – жазалау емес, қайталама қылмыстардың алдын алу. Полиция қызметкерлері мекенжайлық профилактикалық жұмыс жүргізіп, сот белгілеген шектеулердің сақталуын бақылап, құқықтық түсіндірме береді. Тәжірибе көрсеткендей, тұрақты бақылау мен алдын алу шаралары қайталама құқық бұзушылық тәуекелін айтарлықтай төмендетеді, – деді Айтан Елеусизов.