Бұрын ұсталған күдікті пәтерде жиһаз құрастырып, иелерін тонамақ болған. Тергеу жұмыстары жалғасуда.
Алматы қаласында полиция қызметкерлері 2024 жылдың 20 желтоқсанында Наурызбай ауданының тұрғын үй кешенінде орын алған аса ауыр қылмысты ашты. Сол күні ерлі-зайыптыны тонауға әрекеттену кезінде екеуі де ауыр жарақат алып, қазіргі уақытта ауруханада жатыр, деп хабарлайды aqshamnews.kz.
«Күдікті, 38 жастағы Жетісу облысының тұрғыны, жасаған қылмысын мойындады. Оның айтуынша, ол бұған дейін зардап шеккендердің пәтерінде жиһаз құрастырып, олардың сейфі бар екенін байқаған. 20 желтоқсан күні таңертең ол бет-аузын медициналық маска мен шарфпен жасырып, ерлі-зайыптылардың есігін қаққан. Қолына тапанша ұстап, ақшаларын беруді талап еткен», – деп хабарлады полиция.
Алайда үй иесі көмекке шақыра бастаған соң, қаскөй ерлі-зайыптыға оқ атып, оқиға орнынан қашып кеткен.