Алматыдағы Орталық стадионда өтетін Энрике Иглесиастың концертіне дайындық жалғасып жатыр, – деп хабарлайды aqshamnews.kz тілшісі.
Көрермендерден қауіпсіздік талаптарын алдын ала ескеру сұралады. Стадион аумағына басқа келушілерге кедергі келтіруі немесе қауіп төндіруі мүмкін көлемді заттарды, тез тұтанатын және қауіпті заттарды, алкоголь өнімдерін, тыйым салынған заттарды, дрондар мен басқа да ұшқышсыз құрылғыларды алып кіруге болмайды.
Бұған дейін хабарланғандай, стадионға кіреберістер сағат 16:00-де ашылады. Негізгі кіреберіс Абай даңғылы мен Байтұрсынұлы көшесі жағынан ұйымдастырылады. VIP Standing A санатындағы билет иелері үшін Сәтбаев көшесі жағынан бөлек кіреберіс қарастырылған.
Концерт басталар алдында кезекке тұрмас үшін көрермендерден стадионға алдын ала келіп, бақылаудан өтуге кететін уақытты ескеру сұралады.
Концерт өтетін жерге қоғамдық көлікпен жетуге болады. Автобустар мен метро қалыпты режимде жұмысын жалғастырады. Концерт аяқталғаннан кейін көрермендер үшін Абай даңғылы мен Байтұрсынұлы көшесі жағынан жүретін қосымша шаттлдар қарастырылған.
Шаттлдар әуежай, Орбита, Алматы-1 теміржол вокзалы, Райымбек – Алатау және «Алматы Арена» бағыттары бойынша қатынайды.