Алматы қаласындағы ҚР Ұлттық кітапханасында белгілі журналист, ҚР Ақпарат саласының үздігі, Қазақстан Журналистер Одағы сыйлығының лауреаты, «Шалқар» радиосының қызметкері Оңғар Құралдың «Біз қалай сөйлейміз?» атты кітабының таныстырылымы өтті. Іс-шараға ғалымдар, қоғам қайраткерлері, жазушылар, журналистер мен тіл жанашырлары қатысты, деп хабарлайды aqshamnews.kz
Кітаптың өңделіп, толықтырылған екінші басылымына автордың 2002-2005 жылдары Қазақ радиосы мен "Шалқар" радиосында эфирге шыққан «Біз қалай сөйлейміз?» және 2011-2012 жылдардағы «Тіл мәдениеті» атты бағдарламаларының мәтіндік нұсқалары енгізілген.
Бұл еңбек қазақ тілінің тазалығы, сауатты сөйлеу мен жазу, терминдерді дұрыс аудару, сөз тіркестерін орынды қолдану сияқты өзекті мәселелерді қамтиды. Автор күнделікті қолданылатын сөздеріміздің дұрыстығы мен бұрыстығын саралап, тілге қатысты көкейкесті сұрақтарға жауап береді. Сонымен қатар, кітапта тіл тақырыбына арналған танымал тұлғалардың ой-пікірлері мен нақты дәйектері ұсынылған.
«Біз қалай сөйлейміз?» жинағы студенттер, мектеп оқушылары, ұстаздар, журналистер мен қазақ тілінің болашағына бейжай қарамайтын оқырмандар үшін аса пайдалы құрал болып табылады. Бұл еңбек тілді жетік меңгеруге ұмтылған және ана тілін ардақ тұтатын баршаға бағытталған.
Кітаптың басты мақсаты – тіл мәдениетін дамытуға үлес қосу, сауатты сөйлеу мен жазудың маңыздылығын дәріптеу, сондай-ақ ана тіліне деген құрметті арттыру.