Алматы әкімі Дархан Сатыбалдының төрағалығымен балаларға арналған Ғылым музейінің құрылыс барысы мен іске қосуға дайындық мәселелеріне арналған кеңес өтті. Бұл — балалардың ғылым мен технологияға қызығушылығын арттыруға бағытталған жаңа білім беру кеңістігі.
Кеңесте атқарылып жатқан жұмыстардың жай-күйі талқыланды. Қазіргі уақытта ғимараттың инженерлік жүйелері мен конструкцияларын монтаждау жалғасуда, шыны күмбез орнатылып жатыр, экспозиция элементтері мен мультимедиялық инсталляциялар әзірленуде. Экспозициялардың алғашқы легі Алматыға бекітілген мерзімнен бұрын жеткізілді. Сонымен қатар музей контентін әзірлеу бойынша да белсенді жұмыс жүргізілуде: фокус-топтар ұйымдастырылып, сараптамалық талқылаулар өтуде.
Музейдің болашақ мазмұны да кеңейіп келеді. Бағыттардың бірі — балаларға қауіпсіз мінез-құлық дағдыларын қалыптастыруға арналған білім беру анимациясы мен интерактивті бағдарламалар әзірлеу. Бұл буллинг жағдайларында, құрдастар арасындағы жанжалға және өмірде кездесетін басқа да қиындықтарға дұрыс әрі сенімді әрекет етуге үйретуге бағытталған. Осылайша музей тек ғылыми-ағартушылық емес, сонымен бірге әлеуметтік маңызы бар орталыққа айналмақ.
Болашақ музейдің операциялық моделі де қалыптастырылуда: ішкі регламенттер, стандарттар, рәсімдер және лауазымдық нұсқаулықтар әзірленіп жатыр. Қызметкерлерді даярлау мен халықаралық тәжірибені зерделеуге ерекше мән берілуде, соның ішінде Singapore Science Centre орталығының тәжірибесі қарастырылуда. Музейдің ашылуы 2026 жылдың маусымына жоспарланған.
Дархан Сатыбалды балаларға арналған бұл кеңістіктің мазмұны мен құрылысы толықтай балалардың қажеттіліктеріне бағытталуы, барлық сапа және қауіпсіздік талаптарына сай болуы керектігін атап өтті. Алматы әкімі құрылыс барысына, мерзімнің сақталуына және музейді мазмұнмен толықтыруға қатаң бақылауды қамтамасыз етуді тапсырды. Ол бұл нысан елдегі ең үздік балалар ғылыми-білім беру орталықтарының бірі болуы тиіс екенін айтты.