Акция барысында 40 балаға отбасылық демалыс саябағына баруға арналған сертификаттар мен балмұздақ табысталды, – деп хабарлайды aqshamnews.kz тілшісі.
Балаларды қорғаудың халықаралық күніне арналған іс-шаралар жоспары аясында «AMANAT» партиясы аз қамтылған және әлеуметтік осал санаттағы отбасылардан шыққан балаларға қолдау көрсетуге бағытталған қайырымдылық акцияларын жалғастыруда.
Кезекті іс-шара Алматы қаласында өтті. Акция барысында 40 балаға отбасылық демалыс саябағына баруға арналған сертификаттар мен балмұздақ табысталды. Бұл балаларға жазғы демалысты қызықты әрі пайдалы өткізуге, жаңа әсерлер алып, көтеріңкі көңіл-күй сыйлауға мүмкіндік берді.
«AMANAT» партиясынан Алматы қаласы мәслихатының депутаты Болат Ибрагимұлының айтуынша, балаларды қолдау және олардың сапалы демалысына жағдай жасау партия жұмысының маңызды бағыттарының бірі болып қала береді.
«Балалық шақ қуанышқа, жарқын әсерлерге және қамқорлыққа толы болуы тиіс. Әсіресе қолдауды қажет ететін отбасылардың балаларына ерекше көңіл бөлу маңызды. Біз әрбір баланың қоғамның қамқорлығы мен ықыласын сезініп, жазғы демалысын қызықты өткізуіне мүмкіндік жасауға ұмтыламыз. Осындай акциялар балаларға қуанышты сәттер мен жақсы естеліктер сыйлайды», – деді Болат Ибрагимұлы.
Балаларды қолдауға және отбасы құндылықтарын нығайтуға бағытталған «AMANAT» партиясының әлеуметтік бастамалары алдағы уақытта да жалғасатын болады.