2026 жылдың алғашқы жартыжылдығында Алматыда мемлекеттік органдар тарапынан жүргізілген 270 заңсыз тексеру анықталды. Оның 216-сы жеке кәсіпкерлік субъектілеріне қатысты болған, – деп хабарлайды aqshamnews.kz тілшісі.
Бизнесті негізсіз тексерулерден қорғауда Тексеру субъектілері мен объектілерінің бірыңғай тізілімі маңызды рөл атқарады. Ақпараттық жүйеде мемлекеттік бақылау нысандары туралы мәліметтер қамтылып, тексеру актілері электронды түрде тіркеледі. Бұл мемлекеттік бақылау мен қадағалаудың ашықтығын қамтамасыз етіп, заңсыз тексерулердің алдын алуға мүмкіндік береді.
Заң талаптарына сәйкес, профилактикалық бақылау немесе тексеру басталғанға дейін тиісті акт тексерілетін субъектінің немесе нысанның орналасқан мекенжайы бойынша уәкілетті органда тіркелуге тиіс.
«2026 жылдың алғашқы алты айында Алматы қаласы бойынша 9 812 тексеру тағайындау актісі тіркелді. Оның 6 710-ы жеке кәсіпкерлік субъектілеріне қатысты. Қадағалау нәтижесінде 270 заңсыз тексеру анықталды. Оның ішінде 255 тексеру құқықтық статистика және арнайы есепке алу органдарында тіркелмей, ал 15 тексеру белгіленген тәртіпті бұза отырып жүргізілген», – деді ҚР Бас прокуратурасы Құқықтық статистика және арнайы есепке алу жөніндегі комитетінің Алматы қаласы бойынша департаментінің бөлім прокуроры Болатхан Еламан Ардақұлы.
Оның айтуынша, заңсыз тексерулердің 216-сы бизнес субъектілеріне қатысты болған. Атап айтқанда, тіркеусіз жүргізілген тексерулердің 203-і, ал белгіленген тәртіп бұзылған тексерулердің 13-і жеке кәсіпкерлерге қатысты.
«Бизнес субъектілерін бақылаушы органдардың заңсыз араласуынан қорғау мақсатында департамент 32 жағдайда тексеру тағайындау актісін тіркеуден бас тартты», – деді Болатхан Еламан Ардақұлы.
Кәсіпкерлер өздеріне қатысты тексерудің заңды түрде тіркелгенін qamqor.gov.kz ақпараттық порталы немесе Qamqor мобильді қосымшасы арқылы тексере алады. Сондай-ақ қосымшада алдағы тексерулер туралы хабарламалар қолжетімді.
Qamqor мобильді қосымшасын App Store және Google Play дүкендерінен жүктеуге болады.