Алматыда Almaty Bar Shift атты бірегей гастрономиялық жоба өтіп жатыр, - деп хабарлайды aqshamnews.kz.
14-20 шілде аралығында Орталық Азияда тұңғыш рет халықаралық бар мәдениетіне арналған маңызды іс-шара — Almaty Bar Shift ұйымдастырылып отыр. Бір апта бойы шаһар қонақжайлық саласындағы әлемдік трендтерді қалыптастыратын мамандар мен ерекше дәм іздеген тұрғындар мен қонақтардың басын қосатын алаңға айналды. Almaty Bar Shift жобасының авторлары Almaty Tourism Bureau және Shift Project.
Алматыға Вашингтоннан бастап Флоренцияға, Афинадан Кейптаунға дейінгі әлемнің түкпір-түкпірінен атақты коктейль апталығын ұйымдастыратын жандар келді. Олар қазіргі заманғы бар мәдениетінің бет-бейнесін жасайтындар. Әлемнің үздік барларының қатарына енген World’s 50 Best Bars, Top 500 және Michelin гиді сынды рейтингтерде мойындалған барлардың білікті бартендерлері алматылық бардың сөресіне шығып, өнерін паш етіп жатыр.
Іс-шараның басты мақсаты Алматыны әлемдік бар картасына шығару, жергілікті бар индустриясының өкілдерін халықаралық кәсіби ортамен таныстырып, өзара тәжірибе алмасуға жағдай жасау және қаладағы сервис деңгейін жаңа биікке көтеру.
Бағдарлама күндізгі білім беру сабақтары мен кешкі қалалық іс-шараларды қамтиды. Күндіз сала мамандары үшін шеберлік сағаттары, дәрістер мен индустриядағы өзекті тақырыптарды талқылау ұйымдастырылады. Кешкісін танымал баршылар Алматының таңдаулы барында ашық қонақтар ауысымын өткізеді. Олар жергілікті өнімдерді пайдаланып, авторлық коктейлін дайындайды.
«Гастрономиялық туризм — бүгінде әлемдегі ең қарқынды дамып келе жатқан бағыттардың бірі. Алматының бұл саладағы әлеуеті орасан зор. Мұндай жобалар арқылы біз қаламызды өңірдің гастрономиялық орталығы ретінде таныстырамыз. Мұнда әркім талғамына сай дәм мен атмосфера таба алады. Ең қуаныштысы, бізге шын мәнінде шешім қабылдайтын не оған ықпал ете алатын, баратын орындарды көпшілікке ұсынатын сарапшылар келіп отыр. Мұндай коллаборация мен бірлескен жобалар қаламызды Орталық Азиядағы жетекші гастрономиялық бағытқа айналдыруға жол ашады деп сенеміз», — дейді Almaty Tourism Bureau өкілдері.
Ұйымдастырушылардың айтуынша, осындай білім беру кездесулері мен тәжірибе алмасу арқылы Алматы әлемдік трендтерді қабылдап қана қоймай, өзіне тән бірегей жобаларды жасай алатын шаһарға айналып келеді.